London, Iaiong:
2 ngut ki nong Jiw kiba leit shong- leit sah sha London, ki la shah dung tari ha ka Sngi Balang ha ka thaiñ North jong katei ka nongbah hadien katto katne ki jingjia thombor pyrshah ïa ki nong Jiw ha katei ka thaiñ. Na ka liang jong u Myntri Rangbahduh bad ki heh katei ka nongbah, ki la pynrem jur halor katei ka jingjia bad ki la kular ba kin shim khia haba iadei bad kane ka bynta.
La kem ïa uwei u briew hadien ba la iohi ïa u ba u mareh ryngkat bad ka tari ha ka kti jong u katba u dang pyrshang ban thombor bad thmu ban dung ïa ki jaitbynriew Jiw napdeng ki paidbah ba bun kiba don ha katei ka jaka ha katei ka sngi.
Ka la bynrap ruh ba arngut ki briew ki la ngat ha katei ka jingjia shah dung tari bad ki dang shah sumar mynta hapoh ka jakasumar kaba don ha Hatzola, kaba long ka kynhun sumar
nongpang jong ki Jiw kaba shu trei mon sngewbha.
Katei ka jingjia ha ka nongbah jong ka ri Bilat, ka la jia ha Golders Green, kaba dei ka jaka sah jong ka jaitbynriew ba heh paid jong ki Jiw.
Kane ka jingjia, ka long ruh hadien ka jingshah thang ki iingmane bad ki jaka paidbah ha ka thaiñ Shatei Lam Mihngi jong ka nongbah London ha kine ki taiew ba la dep.
Ka long ruh hadien ka jingshah thombor kaba shyrkhei ha kawei ka sinagog kaba don ha ka thain shatei lam mihngi jong ka Manchester ha u bnai Lber ba la dep ha ka sngi kyntang jong ki Jiw kaba kyrteng ka Yom Kippur.
Kata ka jingshah thombor ka la pyniap ïa arngut bad pynmynsaw jur ïa lai ngut, kaba la pynlong ïa ki jaitbynriew Jiw ban nang jur ka jingsngewkhia.
U Starmer u la ïathuh ha ki nongthaw aiñ ha parliament ba ka jingtohkit jong ki pulit ka dang ïaid shakhmat.
