Florida, Jymmang:
Utei u nong Florida u la shah rai pynrem halor ka jingdon kti jong u ban shoh bad ksih pyniap ïa ka khun-ruit jong u hynmen jong u, kaba dang 13 snem ka rta bad kane ka la jia ha ki 50 snem mynshwa bad la rai pyniap noh ïa u pat ha ka janmiet jong ka Sngi Palei hadien ba la pyndep ïa ka jingbishar baroh bad ba la rai ban shim da katei ka jait jingpynshitom haba iadei bad katei ka jingleh kam runar jong u ha kitei ki 50 snem ba la leit.
Ka ïingbishar ka la pynbna iap ïa u James Ernest Hitchcock, 70 snem ka rta, ha ka por 6:12 p.m. da kaba shu injek da ki dawai ban pynsangeh treikam ïa ki dkhot met ha ka met jong u briew bad ïa kane ka leh hapoh ka patok jong ka nongbah Florida. La rai pynrem ïa u halor ka jingpyniap ïa ka Cynthia Driggers ha u Naitung jong u snem 1976.
Ia ka met jong u Hitchcock baroh kawei la sop da ka jaiñ naduh khlieh haduh kjat jong u baroh shi rynïeng. La ong ba ha katei ka sngi, u la ang lyngngoh ïa ka sad jong ka patok ba la set ïa u katba u nongpeit ha katei ka patok u dang iakren phone halor katei ka rai ba la dep ban shim halor ka jingleh kam sniew jong u bad hadien kata, u la kren katto- katne ki kyntien khatduh na ka liang jong u shuwa ba un shah pyniap noh syndon.
“Tang ban ong khublei ïa u Joshua u paralok jong nga. Khublei ïa kiei kiei baroh kiba phi la leh” la ong u Hitchcock khlem da pynjrong kyntien.
Katba u dang kren, uwei u briew uba don ha ka kamra sakhi, u la rah ïa la ka kti, bad u Hitchcock u la rah ïa la ka khlieh ban pyrshang ban peit.
La ong ba ha katei ka por ba la injek da katei ka dawai ban pyniap ïa ka met jong u, u Hitchcock u la khapbrip ïa ki khmat jong u katba ka dawai ka sdang ban treikam ha ka met jong u bad u la ring mynsiem khatduh tang katto- katne sien hashwa ba un iohthiah bad jah mynsiem noh syndon. Hadien shi minit, ka jingring mynsiem jong u ka la nang kham jem bad ka la sangeh noh.
Ym shym la don kano kano ka jingkynthoh kaba lah ban iohi na ki 28 ngut ki nongsakhi kiba don hajan. Uwei u doktor u la wan hadien 11 minit hadien ba la dep pyniap ïa u, u la peit ïa u Hitchcock da ka kor sngap bad u la kyrngah khlieh sha u nongpeit ïa ka kynhun, ban pyntip ba um don shuh.
Katto- katne ngut ki dkhot jong ka longïing jong u Driggers ki la kren sha ki nongthoh khubor hadien kata. Ka para kaba kham rit jong katei ka nongshah pyniap, ka Lynn Cobb, ka la ong ba katei ka khynnah kaba la shah pyniap ha utei u briew, ka dei ka khynnah kaba ju ïa ieid bad sngewtynnad bha ha iing bad ka long ka jingkmen jong ka iing ka sem jongki, ha kitei ki 13 snem ba ka dang im.
Kawei na ki para jong u Driggers, ka Ginie Meadows, ka ong ba U Hitchcock, um ju poi pyrkhat satia ba kane ka sngi, kan wan, hynrei, u la leh bakla hi da lade bad kumta um lah ban lait na ka bainong bad ka pap kaba u la leh ha katei ka shi khyllip mat kaba ka mynsiem iatip lem jong u kam don shuh.
