Dubai, Jymmang:
U nongïalam ba ha khlieh duh jong ka Iran, u la smai ha ka Sngi Palei ban ïada ïa ki bor nuclear bad ki ‘namding jong ka Islamic Republic, ïa kaba u President jong ka America, u Donald Trump, u la pyrshang ban pynduna lyngba ki jingleit hiar thma da ki liengsuiñ bad kum shi bynta jong ka jingïateh kular kaba kham jylliew ban pynskhem ïa ka jingsangeh thma ba pura hapoh Iran.
Ha ka jingthoh ba la pule paidbah da ki nongpule khubor jong katei ka ri, la pynbna ba u Ayatollah Mojtaba Khamenei u la ong ba kawei tang ka kaba ki nong America ki don ha ka Persian Gulf ka dei “ha trai jong ki um jong ka” bad ba la thoh ïa ka “lynnong kaba thymmai” ha ka histori jong katei ka thaiñ.
U Khamenei um shym la paw ha ki paidbah naduh ba u la shimti ïa ka kam kum u nongïalam ba ha khlieh duh hadien ka jingshah pynïap jong u kpa jong u ha ki jinghiar thma ba sdang jong ka thma.
Kane ka jingkren jong u ka wan ha ka por ba ka ioh ka kot jong ka Iran ka dang hiar bad ka karkhana umphniang jong ka ka dang shah pyndik ha ka jingkhang jong ki shipai duriaw jong ka US kaba khanglad ïa ki lieng kit umphniang jong ka ban mih sha duriaw.
Ka ioh ka kot jong ka pyrthei ruh ka don hapoh ka jingeh namar ba ka Iran ka dang pynneh ïa ka jingteh jong ka ha ka duriaw Hormuz, lyngba kaba la kit ïa ka shi bynta na ka san bynta jong ka umphniang mawshun.
Ha ka Sngi Palei, kaba long ka sngi khaii umphniang ba tam, ka umphniang Brent, ka la lah ban khaii haduh $126 shi barel.
Kata ka jingkyndit ïa ka jingpynpoi umphniang bad ka dor ka buh jingeh ïa u Trump, uba dang pynmih ïa ka jingthmu kaba thymmai ban plie biang ïa ka lynti ïaid kaba kongsan kaba la pyndonkam da ki paralok jong ka US ha ka Gulf ban shalan ïa ka umphniang bad ka gas jong ki shabar ri.
Hapoh katei ka jingthmu, ka US kan dang bteng ïa ka jingkhang khyrdep ïa ki kad liengsuin jong ka Iran, katba ka dang iatreilang bad ki paralok ban pynngat ïa ka jinglut kaba heh ha ka jingpyrshang jong ka Iran ban pynthut ïa ka jingtuid laitluid jong ka bor ding, katkum ka jingong jong u heh sorkar, uba la kren khlem da kwah ban pynpaw kyrteng namar ba kim shym la shah ban ai jingmut paidbah.
Ha ka cable kaba la phah ha ka sngi Balang, ka tnat kam bar ri jong ka US ka la bthah ïa ki nongmihkhmat jong ka America ha kylleng ka pyrthei – lait noh kito kiba don ha Belarus, China, Cuba bad Russia – ba kin pan ïa ka jingkyrshan jong ka sorkar nongpdiang jong ki na ka bynta ka jingkhot jingïarap jong ka sorkar Trump ban seng ïa ka “jingtei ïa ka jinglaitluid ha duriaw” ka ban pynthikna ïa ka jingïoh rung laitluid bad khlem jingkhanglad sha ki lieng lyngba ka duriaw bah.
“Kane ka jingkular ka pynpaw ïa ka jingïasngewthuh jingmut kaba jylliew jong ka pyrthei halor ka jingdonkam ban ïatreilang ban ïakhun pyrshah ïa ki jingpynthut duriaw jong ka Iran bad ban pynthikna ïa ka hok bad jinglaitluid ha ka leit ka wan ha ka duriaw bah Hormuz,” ong ka cable, kaba la ïoh kopi da ka The Associated Press ha ka sngi Thohdieng.
Kane ka jingthmu, kaba la ïalam da ka tnat kam pohïing bad ka Pentagon, “ka long ka jingïada kaba kongsan ban ïada ïa ka hok jong baroh ki ri ban ïaid laitluid ha ki um jong ka pyrthei da kaba laitluid bad ban pynngat ïa ka Iran ha ka jingkitkhlieh na ka bynta ki kam ba shyrkhei bad ki kam be-aiñ jong ka ban khanglad ïa ka jingïaid laitluid jong ki khaii pateng,” ong ka tnat.
Ha kajuh ka por, u Trump u la pynpaw ruh ïa ki jingkylla kiba lah ban jia ha ka jingdon jong ki shipai jong ka US ha ki ri kiba ïatreilang ha Europe.
Ha ka sngi hadien ba u president u la pynbna ba ka sorkar jong u ka dang pynlong ïa ka jingbishar bniah halor ka jinglah ban pynduna ïa ka jingdon jong ki shipai jong ka US ha Germany, la kylli ïa u da u nongthoh khubor hato un pyrkhat ne em ban weng noh ïa ki shipai jong ka US na Italy bad Spain – kiba la ïakynad bad ka America halor ka jingpyndonkam ïa ki jaka sah na ka bynta ki kam ba ïadei bad ka Iran.
“Balei ngam dei ban leh”, la jubab u Trump. “Ka Italy kam shym la iarap ei ei ïa ngi, bad ka Spain ka la long kaba shyrkhei, kaba shyrkhei shibun eh.”
Ka jingkhang jong ka US – kaba haduh ka sngi Thohdieng ka la pynphai biang ïa kumba 44 tylli ki lieng khaii, katkum ka jingong jong ka US Central Command – ka long ban khanglad ïa ka Iran ban die ïa ka umphniang jong ka, kaba pynduh ïa ka jingïohnong kaba kongsan katba ka lah ruh ban wanrah ïa ka jinglong jingman ha kaba ka Tehran ka hap ban khang noh ïa ka jingpynmih umphniang namar ba kam don jaka ban buh umphniang.
Ka jingtyrwa jong ka Iran kaba dang shen kan pynkynriah ïa ka jingïakren halor ka prokram nuclear jong ka ri sha ka por kaba hadien.
