Shillong, Jymmang 03
Ka Mawlai SC ka la ïasam mar shi poiñ bad ka ARA FC of Gujarat ha ka jingïakhun kaba lai jong ka I-League 3 2025-26, hadien ba ki la ïakhaid mar 1-1 kol ha ka sngi U Blei ha Khuman Lampak Stadium kaba ha Imphal.
Kane ka la wan lyngba u Damanbhalang Chyne, uba la lah ban pynphai hadien ba ka ARA ka la thep kol nyngkong lyngba u Moinuddin.
Ha kane ka jingïakhun, u coach ka Mawlai u Bah Hering Shangpliang u la pynmih thymmai ar ngut ki rangïalehkai ha kaba sdang ka jingïakhun da kaba wanrah ïa u Vincent Shyrmang bad u Kevin Rymbai ha ka jaka u Ricky Chyne (uba la shah sei red card ha ka jingïakhun ba la lah) bad u Basuklang Bina.
Ha kane ka jingïakhun, ka ARP ka la ïoh ban pynkhih jar nyngkong eh ha ka minit kaba 18 lyngba u Moinuddin ha kaba u rangapkol ka Mawlai u Lambhamiki Lamare um shym la lah ban khanglad na kane ka jingshah thep.
Hadien katto katne por ba la bteng ïa ka kylla miet ka ARA ka la hap ban ïalehkai sa tang shiphew ngut ki rangïalehkai hadien ba u Rohit Chawla u la shah ai jingsneng sa kawei pat ka yellow card kaba ar ha ka minit kaba 57 bad u la shah beh noh na madan na ka daw ba u la pynur ïa u Robertson Khongriah.
Te kumta ka Mawlai ka la ïoh ïa ka kabu kaba biang ban pynphai kylla lyngba u penalty ba la shut da u Damanbhalang (62′). Lyngba kane ka jinglah ban pynïakhaid ka la pynlong ïa ki rangïalehkai ka Mawlai ban ïakhun tyngeh, hynrei haduh kaba kut kam shym la lah ban pynurlong watla ka la ïoh ïa ki kabu kiba biang.
Lyngba kane ka jingïakhaid ka Mawlai ka la kamai 4 poiñ hadien ba ka la jop ïa ka Sikkim Brotherhood bad shah rem ha ka Sunrise Orissa.
Ka Mawlai ka dangsah sa kawei ka jingïakhun kaba khatduh ha ka Group-A pyrshah ïa ka FC Raengdai ha ka sngi Ba-ar ha ka por 3 baje nohphai sngi.
Ki kynhun ki ban wan ha ki kyrdan ba hakhlieh ha kawei pa kawei ka group lem bad ki ar tylli kiba kynsai ki ban wan ha ka kyrdan ba-ar, kin ïoh rung sha ka wat kaba khatduh.
