Bamako, Jymmang:
Katkum ki kaiphod ba la ioh lum, la ong ba ki bor synshar jong ka Mali ki dang pynlong ka jingtohkit kaba bniah ïa ki shipai kiba la suba ba ki donkti ha ki jinghiar thma ba la ïatreilang ha ka taiew ba la dep ha ki ktem shipai ha kylleng ka ri da ki lehnoh ba don jingïadei bad ki lehnoh Al Qaeda bad Tuareg.
Ka thup jong ki nongïadon bynta lang ka kynthup ïa lai ngut ki shipai kiba dang trei ha ka kam, uwei u shipai ba la shongthait bad uwei u shipai uba la shah “pynkynriah kam” bad uba la shah pyniap ha ka jingïakhun hajan ka ktem shipai ba kongsan jong ka ri ha Kati, kaba jngai 15 km shabar jong ka nongbah Bamako, ong ka jingpynbna na u nongmudui ha ka ïingbishar shipai ha Bama ha ka sngi Thohdieng.
“Ki jingkem ba nyngkong ki la long kiba jop, bad baroh kiwei pat ki nongleh kam sniew, ki paralok nongleh kam sniew, bad ki paralok kiba donkti lang ki dang wad bniah bha,” ong ka kyrwoh, khlem da batai katno ngut ki nongleh kam sniew la ithuh bad mano ba la shim kyrpang ha ka jingshah kem.
Ki jinghiar thma ha kajuh ka por kiba la sdang ha ka step jong ka 25 tarik u Iaiong ki la pyni kumno ki nongialeh na ki kynhun bapher bapher kiba don ki thong bapher bapher ki la lah ban hiar thma ha ka pdeng jong ka sorkar shipai jong ka ri Africa Sepngi, kaba la shimti ia ka bor synshar hadien ki jingleh pynkhihwin ha u snem 2020 bad 2021.
U myntri kam pohiing u la shah pyniap bad ki shipai Russia kiba kyrshan ia ka sorkar ki la shah pynbor ban mih noh na ka shnong Kidal kaba don shaphang shathie.
Ka jingshah thombor ka la sdang ïa ka jingïaleh ha kylleng ka ri khlaw kaba heh jong ka Mali shaphang shathie, kaba la pynkiew ïa ka jingkyrmen ban ïoh jingmyntoi kaba khraw da ki kynhun lehnoh kiba la pyni ïa ka jingkwah kaba nang kiew ban hiar thma ïa ki ri ba marjan bad, ki nongpeit bniah ki ong, ha kaba kut ki lah ban buh ïa ki jingthmu jong ki kham sha jngai.
