Shillong, Jymmang 04
Ka B.K Bajoria bad ka SCA Academy ki la jam sha ka final ha ka Under-15 Inter School Cricket Tournament ba la pynlong da ka SCA hadien ba ki la khur jingjop ha ka lah sngi U Blei.
Ha ka jingïakhun semi final kaba la long ha madan Polo, ka BK Bajoria ka la pynliem noh ïa ka Nongthymmai Academy da 5 run. Ka BK Bajoria ka la kam trai ban tied nyngkong, ha kaba ka la kamai 144 run bad shah pynhap 3 wiket ha ki 18 over. U Abishek Das u la long u nongtied uba kynsai ha kaba u la tied 76 run na ki 50 bol bad u Aryan Sunar u la tied 25 run na ki 23 bol. Katba u Avishkar u la khur 1 wiket.
Haba wan beh ïa ka thong, ka Nongthymmai Academy ka kamai tang 139 run bad shah pynhap 7 wiket ha ki 18 over. Ïa ka nam Player of the Match la khur da u Abishek Das.
Haba phai sha kawei pat ka jingïakhun semi final kaba ar, ka SCA Academy ka la jop da 9 wiket lyngba ka ‘DLS method’ ïa ka Shillong Secondary School hadien ba la pynduna sha ki 10.0 over. Ka Shillong Secondary School kaba la shimti ban tied nyngkong ka la kamai 50 run bad shah pynhap 5 wiket ha ki 10 over.
Haba wan shimti ïa ka pali kaba ar, ka SCA Academy ka la kynjoh sha ka thong da kaba kamai 58 run bad shah pynhap 1 wiket ha ki 8.4 over. Ïa ka nam Player of the Match la khur da u Devansh Dep.
Ki jingïalehkai semi final jong ka U-18 kin long ha ka sngi Ba-ar, ha kaba ka St. Nanak kan ïakynduh pyrshah ïa ka Sunrise Academy bad ka St. Anthony’s ïa ka KV Happy Valley.
