Mawkyrwat, Jymmang 06
U President ka Meghalaya Cricket Association (MCA) u James Sangma ha ryngkat ka jingdonlang u MLA ka Mawkyrwat u Bah Renikton Lyngdoh Tongkhar lem bad ki dkhot ka SWKHD Cricket Association, ha ka sngi Balang ki la hiar jurip ïa ka madan kriket jong ka synjuk kaba don ha ka shnong Hilland, South West Khasi Hills District.
Ha kane ka jingjurip, na ka liang u James Sangma u la kular ban ai jingïarap ïa katei ka synjuk na ka bynta ban pyntrei ïa kane ka madan ïalehkai kaba heh kumba 6 acre eiei.
Shuh shuh u la kular ruh ban pynshna ïa ka Indoor Stadium ha ka madan jong kane ka synjuk kaba don ha ka shnong Mawten kum shi bynta ban kyntiew ïa ka jingïalehkai kriket hapoh ka distrik.
Ha kane kajuh ka sngi u James u la ïoh ruh ban plie ïa ki saw tylli ki Cricket Centre kiba kynthup ïa ka Hilland , Pyndenumsaw, Ngun-raw bad Marshilong kiba dei ki shlem ai jinghikai ïa ki khynnah ba kin pyntbit ïalade naduh ba ki dangrit.
Kumta na ka liang ka SWKHD lyngba u Bah Christol Lyngdoh, Vice President ka synjuk u ai khublei ïa u President ka MCA uba la wan hi da lade ha kane ka distrik ban kyntiew ïa ka jingïalehkai kriket hapoh ka thaiñ.
