Shillong, Jymmang 07
U Myntri Rangbah ka Jylla u Conrad K Sangma u la jingkyrshan da ka jingïarap pisa kaba T. 32 lak ïa ka Shillong Sports Association (SSA) lyngba ka Chief Minister’s Special Grant (CMSG) na ka bynta ban pyntyllun ïa ki lympung ïalehkai jong kane ka synjuk.
Ïa kane u Conrad u la pynbna ha ka jingplie ïa ka Shillong League ha ka sngi Palei ha SSA Stadium kaba ha First Ground, Polo. Te kumta la sdang ïa kane ka lympung da ka U-20 4th Division Football League.
Ha kane ka jingplie la ïadon lang ruh u Myntri ka tnat ïalehkai ka Sorkar Jylla u Bah Wailadmiki Shylla ha ka jingïadon lang u President ka SSA u Bah Banteidor Lyngdoh, uba dei ruh u MLA ka Mawkynrew, nangta u President ka Meghalaya Football Association Bah Hamletson Dohling, u Working President bad General Secretary ka Meghalaya State Olym-pic Association u Bah John F. Kharshiing bad u Bah Finely L. Pariat, lem bad ki dkhot nongkitkam ka SSA.
Haba ai jingkren ha kane ka sngi, u Sangma u la ai khublei ïa ka SSA bad ka Meghalaya Foot-ball Association kiba la lah ban pynkhie im ïa ka mynsiem ïalehkai phutbol ha kane ka nongbah bad ha ka Jylla hi baroh kawei.
“Ka phutbol ka bat ïa ka bynta kaba kyrpang ha ki dohnud jong ki paidbah jong ngi bad ki samla jong ka Jylla ki ju pyni ïa ka jingïeid ïa kane ka jingïalehkai. La bun snem, ngim shym la lah ban ai rynsan, ka jingkyrshan bad ki lad ki lynti kiba dei hok ïa kane ka jingïaleh-kai. Nga sngewkmen ba ha kine ki khyndiat snem ba la dep, lyngba ka jingpyrshang lang jong ki nongpynïaid bad baroh kiba don bynta la lah ban kyntiew ïa kane ka jingïalehkai,” u la bynrap.
Kum ka dak jong ka jingplie ïa kane ka lympung, u Conrad u la kyntiew ïa ka lama jong ka SSA bad ha kajuh ka por la ai sngewbha ruh da ka syrnot lem bad ka jersey No 10 sha u Myntri Rangbah bad kumjuh sha u Bah Wailadmiki Shylla da ka jersey No. 7.
Ha kane ka jingplie la pynphuh pynphieng lyngba ka jingïadon lang kiwei pat ki kynhun ïalehkai kiba ïashim bynta ha ka Fourth Division.
Ïa ki kyntien pdiang sngewbha la pynpaw da u Secretary ka SSA u Bah D.L Nongbri bad uba la pynpaw ruh ba ïa ka Detailed Project Report (DPR) na ka bynta kawei pat ka jaka shong jong ki paidbah (sitting gallery) kaba sha ka phang jong ka Wahumkhrah la dep ban phah sha ka Sorkar Jylla na ka bynta ban kyrshan ki lad jingïarap.
