Washington, Jymmang:
Hapdeng ki kynrum kynram kiba mih namar ki par mar poh khyndew jong ka Iran kiba pynthut ïa ka jingtreikam jong ki lieng ha ka duriaw bah Hormuz, u Myntri kam pohiing jong ka US, u Pete Hegseth, u la buh jingkylli hato ka Iran ka lah ne em ban phai khmat sha ki rukom ïakhun da kaba pyndonkam da ki dohkha “dolphin” ban ïakhun pyrshah ïa ki shipai duriaw jong ka US ha ka thma kaba dang iai bteng ha Middle East. Namar kam long kaba eh ban leh ia kane, namar katto katne ki ri, kynthup ïa ka ri America, la ïathuh ba ki la ju pyndonkam da ki “kamikaze dolphin” ha ki jaka ba don ka jingïakynad ha ki por ba la leit.
Hynrei u Hegseth, u la kyntait ïa katei ka jingmut, da kaba ong ba u lah ban pyntikna ba ka Iran kam don ïa ki ‘Kamikaze Dolphin’ hynrei um shym la kren shai ruh la ka US ka don ne em ïa kitei ki jait Dolphin Kamikaze.
Ia kane ka jingmut la pynmih nyngkong eh da ka Wall Street Journal ha ka 30tarik u Iaiong, da ka jingthoh kaba la kynnoh ba ki heh jong ka Iran ki la ong ba ka Iran ka lah ban pyndonkam da ki Kamikaze Dolphin kiba lah ban pynkit ia ki mar poh khyndew na ki um duriaw jongka bad ka lah ruh ban pyndonkam ha ka jingleit thombor ia ki jhad thma jong ka US. Hynrei ym pat lah ban tip shai la ka Iran ka don shisha ne em ia kitei ki jait dolphin.
