Madrid, Jymmang:
Katkum ki khubor, la ong ba ka Spain ka la ïoh mad ïa ka jingshit kaba jur tam ha u bnai Iaiong naduh ba la ioh ban buh rekod ha u snem 1961 da ka jingshit kaba 15.1C ha u bnai ba la dep, ong ka tnat peit mariang jong katei ka ri, ka AEMET.
Ka rekod kaba mynshwa la buh ha u snem 2023 ka poi 15C, la ong ka AEMET, ha ka jingthoh ha ka Social Media ha ka janmiet jong ka Sngi Nyngkong.
Ia ka Spain la shim ba ka dei ka thaiñ kaba hakhmat eh ka ban ioh mad ia ka jingkylla ka suiñbneng, kaba mad ia ka jingshit kaba nang jrong kaba teng teng ka sdang shwa ka por lyiur, ryngkat bad ki jingjia kiba kham bunsien jong ka jingjur jong u slap.
Ka AEMET ka la batai ïa u bnai Iaiong kum “u bnai uba shit haduh katta”, da kaba kdew ba u long 3.2C tam ïa ka jingshit kaba jur ha u snem 1991-2020. Naba la ong ba ha kine ki 6 sngi ba la ïaid jong u bnai Iaiong ki la ioh buh ban ia ka rekod thymmai jong ka jingshit ba man la ka sngi.
Ka Spain ka la mad ïa ki jingpluh khlaw ba bun ha u bnai Iaiong, khamtam ha ka thaiñ Shatei Lam Mihngi, kaba ïadei bad ka jinglong ka suiñbneng kaba khriat bad ka jingshit kaba pher.
Ka jingshit jong u bnai Iaiong ka long hadien ba ka la ioh mad ia u bnai Kyllalyngkot uba jur slap tam ha Spain kumba ka la jia ha ki 47 snem mynshuwa.
Ka Spain ka la sakhi ruh ia 11 tylli ki jingkhie ‘eriong kiba la lynshop ia katei ka ri naduh kaba kut jong u bnai Nohprah haduh ka shiteng bnai jong u Rymphang, ha kaba ki la wanrah ia u slap uba jur bad ka lyer kaba jur ha kitei ki bnai.
Ka Spain ka la ïaid lyngba ia ka jingshit kaba jur tam ha u snem ba la dep, ha kaba ka jingshit ka long haduh 24.2C.
Kumta ruh la ong ba ka Europe bad ka pyrthei baroh kawei ki lah ban mad biang ïa ka jingshit kaba jur bha namar ka jingkylla jong ka suiñbneng, kaba la pynlong ïa ka jingshit jingkhriat ha ka pyrthei ban wanrah jingkylla haduh katta ha u snem 2024 bad la khmih lynti ruh ba kane kan jia biang ha ka shiteng snem jong une u snem 2026.
