Washington, Jymmang:
U President ka America, U Donald Trump, ula ong ha ki khyndiat sngi ba la leit , ba ki “jingïakren ba tikna” ki dang ïaid shakhmat bad ka Iran halor ka jingwad ïa ka lad ban weng ïa kane ka jingeh, hynrei watla katta, u la bynrap ba shen, ka America, kan sa sdang ban synran ïa ki jhad, lyngba ka Strait of Hormuz, kaba la shah khang khyrdep.
Kham mynshwa, u nongaiktien jong ka tnat bar ri jong ka Iran, u Esmaeil Baqaei, u la iathuh ha ki nongthoh khubor ba ka Iran, ka la aiti ia ka plan kaba don 14 tylli ki mat “kaba pynleit jingmut ha kaba pynkut noh ia ka thma”, bad ba ka Washington, ka la jubab ia katei, ha ka khubor sha ki nongpyniasuk jong ka Pakistan.
Ka kynhun ïatreilang jong ka US bad ka Israel, ka la hiar thma ïa ka Iran, ha ka 28 tarik u Rymphang, ha kaba la pynïap ïa u nongïalam ba ha khlieh duh jong ka Islamic republic. Ka Tehran ka la jubab da kaba thombor ïa ki ktem shipai jong ka US bad ïa ki thong jong ka Israel ha kane ka thaiñ.
Ka jingsangeh thma ka la treikam ha ka 8 tarik u Iaiong, bad ka la don kawei ka sien ka jingiakren iasuk kaba beit beit ha Islamabad naduh katei ka por, ha kaba ki ar tylli ki ri ki la sahkut.
Ka Iran ka la bat ia ka jingteh jong ka duriaw Hormuz naduh ba la sdang ka thma, da kaba khanglad ia ka jingtuid kaba heh jong ka umphniang, ka gas bad ka sboh sha ka ioh ka kot jong ka pyrthei, katba ka America ka la pynjari ia ka jingkhang pyrshah ia ki kad liengsuin jong ka Iran.
U Trump u la ong ba “ki ri na kylleng ka pyrthei” ki la pan jingïarap na ka America ban ïaid lyngba ka lynti um ba kongsan bad shabar na ka Gulf.
“Na ka bynta ka jingbha jong ka Iran, ka Middle East, bad ka America, ngi la ïathuh ha kine ki Ri ba ngin ïalam ïa ki Lieng jong ki da kaba suk ban mih na kine ki Lynti Um ba la khang, khnang ba kin lah ban ïaid laitluid bad ba lah ban ïaid shakhmat ïa ki kam jong ki,” ong u Trump.
“Kane ka jingtreikam, ka Projek Jinglaitluid, kan sdang ha ka step jong ka sngi Nyngkong, ka por jong ka thain Mihngi.”
U la khot ia ka kum ka “jingleh sngewbha,” da kaba ong ba bun na ki lieng kiba la shah rong noh ki “duna jingbam, bad kiei kiei baroh kiba donkam na ka bynta ki nongtrei kiba heh ban sah ha ka lieng ha ka rukom kaba koit ba khiah bad kaba khuid.”
