Mairang, Jymmang 11
Ka kynhun ïalehkai jong ka Mawphanaiñ United SS&-CC ka la khur ïa ka jingjop kaba sdang ïa ka lympung ïalehkai “Mawthadraishan Football League” ha ka sngi Saitjaiñ.
Ïa kane ka lympung ïalehkai kaba nyngkong ha kane ka thaiñ la pynlong da ka Mawthadrai-shan Sports Association ha madan Shnong Kynshi Umsoit kaba ha Eastern West Khasi Hills District, bad ka jingthmu jong kane ka lympung ka long kum shi bynta ban plie lad plie lynti ïa ki khun samla kiba don ka sap ha ka jingïalehkai phutbol bad ban ai rynsan ïa ki.
Ka jingïoh khur jing-jop ka Mawphanaiñ ka la wan hadien ba ka la lah ban pynliem noh da 2-0 kol ïa ka Rngisawlia SC.
Ïa kane ka lympung la wan ban plie da u Producer & Editor U Shillong Mail u Bah Kyrmenlang Uriah kum u Kongsan ha ka jingïadonlang u President ka synjuk uba dei ruh u MDC ka Mawthadraishan konstitwensi u Bah Powell Sohkhlet, u Sordar Shnong Kynshi Mawphanain u Bah B. Sohlang, kiwei ki nongkitkam ka synjuk ha ryngkat ki paidbah bad ki samla kiba shim bynta ha kane ka lympung ïalehkai.
Lah ban kdew ba ki la don haduh 26 tylli ki kynhun kiba la wan ban ïashim bynta bad kine baroh ki dei tang na kane ka dong ka thaiñ Mawthadraishan.
