Shillong, Jymmang 11
Ka Barcelona ka la lah ban rah ïa ka nam lahduh kaba 29 ha ka lympung La Liga hadien ba ka la lah ban pynliem noh ïa ka Real Madrid da 2-0 kol ha ka jingïakhun kaba la long ha ka sngi U Blei ha Clasico.
Kane ka jingjop ka la pynskhem ïa ka kynhun jong u Hansi Flick ban ïai bteng ïa ka jop jong ka ha kane ka lympung bad pynlong ïa ka Madrid ban ym lah ban khur ïa ka trophy ha kane ka samoi ïalehkai.
Ha kane ka jingïakhun ka Barca ka donkam tang ban lait na ka jingshah rem, hynrei ka la lah ban khur syndon ïa ka jingjop ha Camp Nou. U Marcus Rashford, uba la mih madan ban ïalehkai ha ka jaka jong u rangïalehkai ba la mynsaw, u Lamine Yamal, ha kaba u la ïoh ban pynkhih jar lyngba ka free-kick.
U Ferran Torres u la thep ïa ka kol kaba ar hadien ka jingïarap pynbuh da u Dani Olmo, kaba la biang pura ïa ka kynhun ban lehkmen ha ryngkat ki nongkyrshan jong ka.
Ha ka jingshisha ka Real Madrid ka la pyrshang ban pynphai, hynrei ka la pynlehnohei ïa ki kabu ksiar. U Jude Bellingham u la shah kyntait ïa ka kol na ka daw ba ka dei ka offside, katba u Vinicius Junior u la shah khanglad noh ha u rangapkol ka Barcelona u Joan Garcia.
Ka jingjop jong ka Barcelona ka la kham pynkmen ïa u coach u Hansi Flick namar dangshen u la duh noh ïa la u kpa uba la khlad noh. Ha ka jingshisha kane ka kynhun ka la dei ban thep bun kol lyngba u Rashford, Raphinha bad u Robert Lewandowski.
Hadien ba la kut ka jingïalehkai, u rangïalehkai shapdeng kane ka kynhun u Frenkie de Jong u la ong ba kane ka nam lahduh ka la long kaba kyrpang bha namar ka la long pyrshah ïa ka Madrid ha la ïing.
“Kane ka nam lahduh ka long kaba kham kyrpang ban jop ïa ka ha la ïing pyrshah ïa ka Madrid, mynta ngi dei ban lehkmen lang bad ki nongkyrshan,” u la bynrap.
“Ngi la long ka kynhun kaba kynsai ha Spain, hooid ngi kwah ban jop sa ïa ka Champions League, kata ka dei ka thong ka jong ngi. Ha u snem ban wan ngin sa ïoh biang ïa ka kabu,” bynrap biang une u rangïalehkai na Netherlands.
