Dubai, Jymmang:
Ka nongjop Nobel Peace Prize jong ka Iran, kaba la shah set patok, ka Narges Mohammadi, ka la shah pynkit noh sha kawei ka Hospital ha ka nongbah Tehran jong katei ka ri bad la shah ban pynsangeh ia ka jingpynshitom jongka, da kaba pyllait jamin noh shwa.
Ka Mohammadi, kaba 54 snem ka rta, ka la ioh ia katei ka khusnam ha u snem 2023, katba ka dang don ha patok, naka bynta ka jingiakhih ban kyntiew ia ka hok jong ki kynthei bad ban pynduh noh ia ka jingshim rai pyniap. La ong ba ha kine ki 2 taiew ba la dep, ka la ioh kem pang kynsan bad la lap ba ka don ia ka jingpang kyndit bad kumta khlem da pynslem ki la iakhih ba dei ban pyllait noh ia ka ioh kan iap ha ka kti jong ka aiñ.
Ki bahaïing jongka, ki la kyrpad ban pynkynriah noh ïa ka na Zanjan, kaba don sha ka phang Shatei Lam Mihngi jong ka nongbah Tehran, ha kaba la set patok ia ka baroh shi katta bad ha kaba nyngkong eh, la rah ïa ka sha jakasumar ban phaha peit bniah bad phah sumar bha ia ki jingpang jingshitom baroh.
Kumta, la ong ba ka Mohammadi mynta ka don hapoh Tehran Pars Hospital bad ka don hapoh ka jingsumar jong ka kynhun sumar hadien ba la pynkit ia ka sha katei ka jakasumar da ka kali kit nongpang.
Ja Mohammadi ka la shah rai pynrem da ka jingshah set patok kaba thymmai kaba 7-1/2 snem, la ong ka kyrwoh ha u Rymphang, katto katne taiew hashwa ba ka US bad ka Israel kin leit hiar thma pyrshah ia ka Iran, ha kaba, ka komiti Nobel ha katei ka por ka la khot ia ka Tehran ban pyllait noh mardor ia ka.
Kane ka nongioh khusnam ka la shah kem noh ha u Nohprah hadien ba ka la pynrem ia ka jingiap jong u nongiasaid aiñ, u Khosrow Alikordi.
Watla katta, la ong ba ym shym la ai jingtip bniah shaphang ka jingpyllait jamin ne ka jingpynsangeh ia ki jingshah pynshitom ia ka.
Ka Iran ka la khang ïa kiba bun ki bynta jong ka internet ha ka ri ha u Kyllalyngkot namar ba ki bor synshar ki la pynduh – pyndam ïa ki jingïakhih paidbah kiba la mih na ka jingbymsuk ha ka liang ka ioh- ka kot.
