Shillong, Jymmang 11
Ki san tylli ki kynhun ïalehkai ka nongbah Shillong ba kynthup ïa ka klob ba bat ruh ïa ka nam lahduh ka Mawlai SC, kumjuh ka Shillong Lajong FC, Nongkseh SSCC, Nangkiew Irat SC bad Rangdajied United FC, ki la lah ba kin khur ïa ki nam jop ki ha ka pre-quarter final jong ka 5th Meghalaya State League ha ka lah sngi U Blei.
Kiwei pat ki ar tylli ki kynhun kiba la lah ban jam shakhmat ha kane ka lympung ki long ka Maram FC bad ka Rymbai Shkenshynriah.
Katba ka jingïakhun ha Mairang ba la dei ban ïakhun hapdeng ka Langsning FC pyrshah ïa ka Lumphyrnai Sohphoh FC, la hap ban pynsangeh namar ka jingbym ailad jong ka suiñ bneng bad ïa kane ka jingïakhun yn kynriah sha madan ïalehkai jong ka SSA Stadium Shillong bad kan long mynta ka sngi Ba-ar ha ka por 6:45 janmiet.
Ha kane ka jingïakhun pre-quarter final, ka Nangkiew Irat ka la lah ban pynliem noh ïa ka Khimusniang SC da 2-1.
Katba ha ka jingïa-khun ba la long ha Amlarem, ka Mawlai SC ka la pynpaw ïa ka jingkhlaiñ ha kaba ka la lah ban pynjem khnap haduh 11-0 kol ïa ka Thangskai Tiger SC.
Ki rang ïalehkai ka Mawlai ba la ïoh ban thep kol ki long Robertson Khongriah (13′, 18′, 32′) uba la khur ïa ka hat-trick, kumjuh u Wadshwa Latoo (56′, 81′) , Jestibor Mawlong (83′, 88′), Samlang Rympei (28′), Fairming Suting (45’+1), Kevin Rymbai (57′) bad u Basuklang Bina (59′).
Ha kane ka kynti jong ka jingïakhun, ka Mawlai SC ka la wanphai pura biang kum ka kynhun, hadien ba ki rangïalehkai kiba pura ki jong ka, ki la wanphai noh sha la ïing hadien ba ki la dep ban ïashim bynta ha ka I-League 3 ba la long ha Manipur.
Ha kawei pat ka jing-ïakhun, ka Shkenshynriah ka la pynliem noh ïa ka Amlarem SC da 2-0 kol bad ïa kine ki kol la thep da u Hesmiki Rymbai (7′, 26′).
Katba ka lahduh jong kane ka lympung ha u snem 2023, ka Rangdajied United ka la jop da 3-1 kol ïa ka Janepih YSCA.
Katba ka lahduh u snem 2019, ka Shillong Lajong FC ka la lah ba kin pynliem noh da 5-0 kol ïa ka Mishon SSCC, ha ka jingïakhun ba la long ha Wahïajer. Ka nam tam ha kane ka jingïakhun ki long u Fridison Wanñiang (57′, 81′, 86′) uba la khur ïa ka hat-trick bad ïa kawei pat la ïarap pynthep da u rangïalehkai ka liang pyrshah u Deibormame Tong-per (45’+2).
Ha ka jingïakhun ha Mawkyrwat, ka Maram FC ka la jop da 1-0 kol ïa ka Seng Samla Umdang Pyllun bad ïa kane la thep ha ka minit ba 68 da u Tremarchwal Ch Marak.
Haba phai sha kawei pat ka jingïakhun ka Nongkseh SSCC kaba la lah ban pynliem ïa ka Mawphu da 4-0 kol. U Hardy Cliff Nongbri (36′, 66′) u la thep marwei ar kol, katba ïa kiwei pat la thep da Shano Tariang (45’+8) bad u Chesterpaul Lyngdoh (64′).
