China, Jymmang:
Katkum ki khubor, la ong ba u President ka US – u Donald Trump un leit ban jurip sha China naduh ka 13 tarik haduh ka 15 tarik jong une u Jymmang bad ia kane la pyntikna da ka China ha ka Sngi Nyngkong, ha kaba, la khmih lynti ba u Trump un iakren bad ka China halor ka khaïi- pateng bad katei ka ri bad kumjuh ruh ia ki mat ba iadei bad ka thma ha Iran.
Ka US bad ka China ki la ïaknieh halor ki mat ba kongsan naduh ka jingsiew dor ïa ka khaii pateng haduh ka thma Middle East bad ka Taiwan, kaba ka China ka kam ba ka dei ka bynta jong ka jaka jong ka.
Ha kaba sdang jong u Trump, u la thmu ban leit jngoh ha kaba kut jong u Lber ne ha kaba sdang jong u Iaiong, hynrei u la pynsangeh noh ïa ka jingleit jong u, ban pynleit jingmut ha ka thma Iran.
“Ha ka jingkhot jong u President Xi Jinping, u President jong ka United States of America u Donald J. Trump un sa leit jngoh ia ka ri sha China naduh ka 13 haduh ka 15 tarik u bnai Jymmang,” la ong u Lamphang ka tnad kam bar ri jong ka China.
La khmih lynti ba U Trump un pynkhih ia u Xi halor ka Iran katba u dang thmu ban pynduna ia ka jingeh ha ka khaii pateng, ong ki heh jong ka US.
Ka China ka dei ka nongthied ba kongsan jong ka umphniang Iran, khamtam lyngba ki karkhana pynkhuid umphniang ba laitluid kiba shaniah ha ka umphniang ba la pynduna dor na ka ri Islam.
“Kane kan long ka jingleit jngoh kaba don jingmut bha kum ka dak”, la ong ka Anna Kelly, ka nongsynshar pathai khubor jong ka US, ha ki nongthoh khubor ha ka jingkhot.
“Hynrei shisha, u President Trump um ju leit jingleit tang na ka bynta ka jingpynpaw dak. Ki paidbah America ki lah ban khmih lynti ba u president un pynpoi shuh shuh ïa ki jingïateh kiba bha na ka bynta ka ri jong ngi.”
Ka jingleit jngoh nyngkong jong u Trump sha China ha ka samoi treikam ba ar jong u kan don ka jingleh burom bad ka jinglehniam kaba kynthup ia ka jingleit jngoh ia ka Temple of Heaven ha Beijing bad ka jingkhawai kaba heh bha jong ka jylla, la ong ka White House.
Kane ka dei ka jingleit jngoh kaba nyngkong jong u president ka US sha China naduh u snem 2017.
