Shillong, Jymmang 11
U MLA barim ka Mawlai u Bah PT Sawkmie, u la ong ba sah sa tang ka Carrom Board kaba dangïoh ban pynïalehkai ïa ka jingïakob hapoh Mawlai, ba la pynïaid da ka Lawei ka Ri namar ka jingduna jong ka jingïoh ïa u synñiang.
U Bah Sawkmie kum u kongsan u la pynpaw ïa kane ha ka sngi pynkut ïa ka 19th Lawei Ka Ri Open Carrom Championship, 2026 ba la pynïaid da ka Lawei ka Ri Sports Social and Cultural Club ha ka sngi Saitjaiñ ha Indoor Sports Hall kaba ha Mawlai Mawdatbaki. Ïa kane la lympung la sdang naduh 5 tarik mynta u bnai.
U la ong ruh ba mynta ym ju kham ïohsngew shuh ban pynlong ïa ki lympung ïalehkai phutbol, kriket, chess bad kiwei kiwei hapoh Mawlai Constituency.
Kumta u la ai khublei ïa ki nongpynïaid kumjuh ïa kiba ïashim bynta, kaba u la ong khlem ma ki kane ka jingïakob kan ym long kaba jop.
Haba phai sha ka jingïakhun, ha ka Boys Single la rah da u Nicholas Kharjana bad ba la wan ba-ar la ïoh da u Meban Marweiñ. Ha ka Veteran Single la wan nyngkong da u Bunlang War bad ba-ar u Albinus Lyngdoh. Ha ka Women’s Single la jop da ka Kong F. Nongkynrih bad ba-ar Kong Bada Dohling. Ha ka Men’s Single la jop da u Bitu Sarkar bad ba la wan ba-ar la ïoh da u K. Lyngdoh.
Ha ka Men’s Double la ïohrah da u Bah S. Syiem bad Bitu Sarkar bad la wan ba-ar da u Bah P. Ginuid bad Teibor Marbaniang. Ha ka Mixed Double la ïoh rah da ka Eva Ïawphniaw bad u Albinus Lyngdoh bad ba wan ba-ar dei ka Kong Bada Dohling bad u Justice Kharkongor.
Ha ka jingïalehkai kynhun la rah da u Amar Akbar Anthony bad wan ba-ar ka Ryntihlang.
U Bah Sawkmie u la sam ruh ïa ki khusnam sha ki nongjop ha ka jingdon ryngkat ki nongkitkam ka synjuk.
