Shillong, Jymmang 11
U Myntri ka tnat ïalehkai ka Sorkar Jylla u Bah Wailadmiki Shylla u la pynpaw ba ka Sorkar ka la wanrah ïa ka aiñ ban pynrung kam Sorkar khlem da donkam ban ïaleh eksamin ïa ki nongïalehkai kiba wanrah takma ïa ka Jylla ha ki lympung ïalehkai kum ka National Games, Asian Games, South Asian Games bad Para Olympic.
Ïa kane u la pynpaw ha ka jingïalang pynkup burom bad sam khusnam sha ki khynnah kiba ïashim bynta ha ki prokram ïalehkai bapher bapher ba la pynlong dangshen da ka OM Roy Memorial Secondary School, ha ka lah sngi U Blei ha kaba la ïadon lang u Vice President ka Shillong Sports Association Bah B. Kharnarry kum u symbud kongsan, kumjuh ka Headmistress jong ka skul Kong A. Syiemlieh, ki nonghikai bad ki khynnah skul.
U Bah Wailadmiki u la kyntu ïa ki khynnah ba kim dei ban isih ïa ka kam ïalehkai namar na ka district level kin poi sha ka state level bad haduh ba kin da ïoh ban mihkhmat ïa ka Jylla bad ïa ka ri India ruh kumjuh bad lada ki trei shitom kin sa ïoh ban kheit ïa u soh ka jingjop.
Shuh shuh u la kyntu ïa ki khynnah ba ki ym pynlehnohei kai ïa ka spah ka phew bad ka jingtrei shitom ki kmie ki kpa kiba jaw syep jaw syar ban kyrshan ïa la ki jong ki khun ha ki jingpule jong ki.
Ha kane ka sngi la pynkup burom ruh ïa ki khynnah kiba la wanrah burom ïa katei ka skul ha ki lympung ïalehkai bapher bapher, kynthup ïa ki khynnah kiba la khur ïa ka nam lahduh ha ka U-17 Boys North East Zone ba la pynlong da ka Reliance Foundation mynta u snem 2026.
La pynkup burom ruh ïa ki ar ngut ki khynnah kiba don ha ka sap ïalehkai bad kiba la wan ha ka kyrdan first division ha ka eksamin SSLC kiba la ïoh ‘distinction’ ha ka subjek Mathematics & English jong u snem 2025. Kine ki long u Ramkynsai Pasi bad u Bankitlyngkor Diengdoh.
