Shillong, Jymmang 12
Ka jingïaid lynti ka kynhun ïalehkai U-17 ka ri India ha ka AFC U-17 Women’s Asian Cup China 2026 ka la poi sha kaba kut, hadien ba ka la mad ïa ka jingshah rem ha ka China PR da 3-0 kol ha ka jingïakhun quarter-final kaba la long ha ka lah sngi U Blei ha Suzhou Sports Centre Stadium.
Kane ka jingshah rem ka la long ruh ka jingduh ïa ka lad ban ïoh rung sha ka FIFA U-17 Women’s World Cup Morocco 2026, watla katta ka India ka la lah ban pyni ïa ka mynsiem ïakhun ha kane ka lympung bad kan dei ka sien kaba nyngkong eh ba kan lah ban jam shaduh ka quarter final.
Ha kane ka jingïakhun ka coach jong kane ka kynhun ka Pamela Conti ka la kylliang tang kawei ka ‘thei ïalehkai na kaba ka kynhun ka la lah ban pynliem ïa ka Lebanon ha ka jingïalehkai group kaba khatduh, ha kaba ka Joya ka la mih bujli ha ka jaka ka Anushka Kumari. Katba ka Bonifilia Shullai ka la ïoh ban mih madan ha ka kylla miet ha ka jaka ka Thandamoni Baskey.
Watla kane ka jingïakhun ka la long kaba ïakhaid bha ha kaba sdang, hynrei hadien shiteng kynta ka China ka la ïoh ban pynkhih jar nyngkong lyngba ka Huang Qinyi ha ka minit kaba 38 bad ïa ka kol kaba ar la thep da ka Liu Yuxi (45+4′) lyngba ka penalty na ka bynta ban tam 2 kol ha ka kylla step. Ka China ka la thep biang sa shi kol hashwa ban wai lyngba ka Li Qixian (90′) na ka bynta ban khur syndon ïa ka jingjop.
