Shillong, Jymmang 12
U Antonio Lopez Habas u la pynkhreh ban mih noh na ka Inter Kashi hadien kumba ar snem ba la don ha katei ka klob, la pynpaw une u manager uba na Spain ha ka rynsan social media.
U Habas u la pynïasoh sha ka Kashi ha u snem 2024 bad u la lah ban pynurlong ïa ka ban rah ïa ka nam lahduh ha ka I-League ha ka samoi ïalehkai kaba bud, ha kaba u la long tang ma u, u coach uba la jop ïa baroh ar tylli ki lympung ïalehkai I-League bad Indian Super League (ISL). Hynrei ka jingeh ha ka liang ka jinglut jingsep ha katei ka klob mynta ka samoi ka la pynsniew dur noh ïa ka jingïadei jong u bad ki bor pynïaid.
“Ka Inter Kashi ka don ha ka jingeh kaba khraw bha bad ka don shibun ki jingeh ha ka klob. Ngi donkam ban ïakren shaphang ka jinglong jingman jong ki nongïalehkai bad ki nongtrei bad u trai jong ka klob, namar ba kam long kaba lah ban ïakhun ha ka ISL”, la ong u Habas ha ka jingïalang bad ki nongthoh khubor hadien ba ka Kashi ka la shah rem da 0-3 ha ka Punjab ha u bnai ba la dep.
“Nga sngewsih shibun eh ïa kane ka jinglong jingman. Ngi la ïakhun tyngeh naduh ka samoi ba la dep, bad mynta ka lah ban long ba ki nongïalehkai bad ki nongtrei kin ym ïoh ïa ka tulop jong ki. Kam lah ban long kumta,” bynrap biang u Habas.
Une u coach uba na Spain u la la lah ban pynjop ïa ka samoi ïalehkai ba nyngkong jong ka ISL naka bynta ka Atletico de Kolkata, bad u la ïalam ïa ka Mohun Bagan Super Giant ban long ka nongjop ïa ka League Shield ha u snem 2024. U dangïai long uwei na ki coach uba kynsai ha ka phutbol ha India ha kine ki khyndait por.
“Da ka jingïasnoh kti, ngi la lah ban pynurlong ïa ki jingthmu. Ban jop ïa ka I-League, ban kiew kyrdan sha ka ISL, bad ban pynthikna ba ka klob kan ïai sah ha ka kyrdan ba hakhlieh ha ka lympung ïalehkai jong ka ri,” la bynrap u Habas halor ka jingtrei shitm jong u ha Kashi.
“Nga kwah ban ai khublei ïa baroh ki nongïalehkai bad ki nongtrei jong nga na ka bynta ka jingburom, ka jingaiti, ka jingtrei shitom, bad ka jinglong ba kloi ban ïatreilang ha kane ka jingïaid lynti. Nga kitbok kitrwiang ïa baroh na ka bynta ka lawei.”
