Shillong, Jymmang 12
Ki bor pynïaid ka OM Roy Memorial Secondary School ki la dap da ka jingkmen kaba khraw hadien ba ki la ïoh ïa ka jingkular na u Myntri ka tnat ïalehkai u Bah Wailadmiki Shylla ban mang pisa T. 50 lak tyngka na ka bynta ban tei ïa ka madan ïalehkai phutbol ha Mawtawar.
Kane la wan hadien shi snem ba kane ka skul ka la mad ïa ka jingdiaw mynsiem lyngba ka jingbym lah ban poi u Myntri barim ba dei khmih ïa ka tnat ïalehkai u Bah Shakliar Warjri sha ka jingïalang kaba ki la khot kyrpang ïa u na ka bynta ban shimti kum u kongsan.
Ym lah ban len ba wat hapdeng ka jingpynkhreh pynkhrum da ka skul bad ruh ban khot sngewbha ïa kiba bun ki riew pawkhmat bad ki ophisar, hynrei shwa ban sdang ka prokram la ai jingtip ba um lah ban poi na ki daw bym lah kiar.
Hynrei ha ka lah sngi U Blei kane ka skul kam lah khlem da ai khublei ïa u Bah Wailadmiki uba la poi sha kane ka jingïalang kaba kyrpang ban pynkup burom bad ban sam khusnam sha ki khynnah kiba ïashim bynta ha ki prokram ïalehkai bapher bapher ba la pynlong dangshen da kane ka skul.
Te kumta na ka liang kane ka skul ka la aiti ïa ka dorkhas sha utei u Myntri na ka bynta ban ai jingkyrshan halor ka jingthmu ban tei ïa ka madan ïalehkai phutbol kaba Mawtawar. Te kumta na ka liang u Bah Wailadmiki u la kular ban mang pisa T. 50 lak na ka bynta kane ka jingtei.
“Ngi sngewkmen eh ba watla ngi la don hapdeng ka jingsngewdiaw mynsiem ïa kaei kaba la jia ha u snem ba la lah, hynrei mynta ngi la ïoh ïa ka jubab na utei u Myntri halor ka jingangnud ban tei ïa ka madan phutbol ha Mawtawar. Kum ka skul ngi la lah ban pynmih shibun bah ki khynnah kiba la paw ha ki kam ïalehkai bapher bapher bad kiba kham bun ki dei ha ka phutbol ha kaba mynta ki la don ha ki klob bapher bapher jong ka nongbah, kumjuh sha ki klob jong ka Indian Super League bad ha kylleng jong ka ri India,” la pynpaw ka Headmistress jong ka skul Kong A. Syiemlieh haba ïakren bad u nongthoh khubor.
Ka Kong Syiemlieh ka la long ba kane ka long ka sien kaba nyngkong eh ba utei u Myntri un wan ïukjat hapoh katei ka skul namar ym pat ju don koit ki ban wan naduh ba ka la sdang ban ïashim bynta bha ha ki kam ïalehkai naduh u snem 2007.
