Shillong, Jymmang 12
Ka Katy Perry, u Michael Buble bad ka Alanis Morissette ki long napdeng ki nongrwai ki ban shim bynta ha ki lai tylli ki jingïalang plie ïa ka lynpung ïalehkai FIFA World Cup 2026, ka ban sdang ha Jylliew mynta u snem.
Kine ki prokram kin long shwa jong kawei pa kawei ka jingïalehkai ba nyngkong eh ban pynlong ha USA, Canada bad Mexico.
U khlur nongtem ba paw na Colombia u J Balvin bad ka nongrwai kaba long ruh ka nongthoh jingrwai na South Africa u Tyla kin ïashim bynta ha ka jingïalang plie ka ban long ha ka 11 tarik u Jylliew ha Estadio Azteca ha Mexico City, shwa ba ka Mexico bad ka South Africa kin ïalehkai jingïalehkai kaba nyngkong ha kane ka lympung kaba don 104 tylli ki jingïalehkai.
Ha ka sngi kaba bud, ki nongrwai bad nongthoh jingrwai na Canada, u Michael Buble bad ka Alanis Morissette kin shim bynta ha ka jingplie ha BMO Field kaba ha Toronto hashwa ba ka Canada kan ïakhun pyrshah ïa ka Bosnia bad ka Herzegovina.
Ha ha USA, ka khlur nongrwai pop ka Perry bad u nongrwai Rap u Future kin ïashim bynta ha shwa ba ka USA kan ïakhun pyrshah ïa ka Paraguay ha SoFi Stadium kaba ha Los Angeles ha ka 12 tarik u Jylliew.
“Ka Fifa World Cup ka dei ka khyllipmat jong ka jingkmen lang ha ka pyrthei, bad kata ka sdang na ka rukom ba ngi ïakynduh lang,” la pynpaw u President ka FIFA, u Gianni Infantino.
“Yn sdang na Mexico City bad yn bteng ha ki sngi kiba bud ha Toronto bad Los Angeles, kine ki jingïalang plie kin wanrah lang ïa ka jingrwai, ka kolshor bad ka phutbol ha ka rukom kaba pynpaw ki jinglong tynrai ha la ki jong ki ri bad ka jingïatylli ha kane ka lympung.”
Dengshen mynta ka taïew ka khlur rwai pop jong ka Colombia, ka Shakira, ka la pyllait ïa ka jingrwai na ka bynta kane ka lympung, ha kaba la don lang u ka nongrwai na Nigeria, u Burna Boy.
