Shillong, Jymmang 13
Ka lahduh jong ka aïom ba la lah, ka Mawlai SC ka la lah ban pynïakhaid mar 1-1 kol pyrshah ïa ka Nongkseh SSCC ha ka jingïalehkai kaba nyngkong jong ka Super 8 ha ka 5th Meghalaya State League.
Ha kane kajuh ka Group-A, la sakhi ruh ïa ki ar tylli ki kynhun kiba la khur teng ïa ki nam lahduh, ha kaba ka Shillong Lajong FC ka la pynliem ïa ka Rangdajied United FC da 1-0 kol bad ïa kane la thep da u Banlamkupar Rynjah (73′).
Kham hashwa u Hardy Cliff Nongbri u la ïoh ban pynkhih jar nyngkong ha ka minit kaba 39 na ka bynta ka Nong-kseh, hynrei u Verjelous Shylla (90’+3) u la lah ban pynïakhaid na ka bynta ka Mawlai. Kane ka jingïa-khun ka la long kaba itynnad ha kaba la wan ban sakhi da kiba bun ki paidbah ban kyrshan ïa kine ki kynhun ha SSA Stadium.
Ka jingïalehkai kaba bud ka Lajong ka la ïalehkai bha ha ka kylla step ha kaba u Deibormame Tongper u la ïoh ïa ka kabu kaba biang, hynrei u la shah khanglad noh ha u rangïalehkai ‘dien ka liang pyrshah. Ka RUFC kam shym la lah ban pynpaw ïa ka mynsiem ïakhun hashwa ba kan jam sha ka Super 8, hynrei ka Lajong ka la long kaba khlaiñ bor ban pynpaw ïa ka jingtbit.
Ki jingïalehkai Super 8 jong ka Group-B kin long mynta ka sngi Palei ha kaba ka Nangkiew Irat SC kan ïakhun pyrshah ïa ka Rymbai Shken-shynriah SC ha ka por 11 baje mynstep bad ka Langsning FC ïa ka Maram FC ha ka por 3 baje nohphai sngi. Baroh ar kine ki jingïakhun kin long ha madan MFA ha Polo.
