Shillong, Jymmang 13
Ka kynhun ïalehkai U-20 ka Jylla ka la pynjem khnap ïa ka Andhra Pradesh haduh 8-1 kol na ka bynta ban bteng ïa ka jingjop kaba lai ha ka jingïalehkai ka Group A jong ka U-20 Men’s National Football Championship 2026, ha ka sngi Balang ha Narainpur, Chhattisgarh.
Ki lai ngut kiba la lah ban thep mar ar kol ki kynthup ïa u Alex Manar (9′, 45′), Mebanlamlynti Masharing (16′, 28′) bad u Ryan G Kharnaior (48′, 50′). Katba ïa kiwei pat ki shi kol la pynbud da u Phermanbha Lyngdoh (58′) bad u Sholinstar Syngkli (84′). Hynrei U B Bharath Kumar Reddy (25′) u la lah ban pynphai kylla shi kol na ka bynta ka Andhra Pradesh.
Kumba ka paw kane ka kynhun ka la long kaba kynsai ha kaba ka la lah ban ïalehkai bha naduh kaba sdang kat haduh ba ka la lah ban pynliem ïa katei ka kynhun kaba na Andhra Pradesh.
Lah ban kdew ka Meghalaya ka la lah ruh ban pynliem ïa ka Bihar da 3-1 kol ha ka 9 tarik mynta u bnai bad ïaka Jharkhand da 5-0 kol ha ka 11 tarik.
Kane ka kynhun kan pynkhreh ïa ka jingïalehkai kaba khatduh na kane ka group pyrshah ïa ka Rajasthan ha ka sngi U Blei.
