Shillong, Jymmang 14
Ka Shillong Lajong FC kaba la wanphai biang sha ka ïing, kan pynkhreh ïa ka jingïalehkai kaba khatduh ha ka lympung ïalehkai Indian Football League 2025-26 pyrshah ïaka Rajasthan United FC mynta ka sngi Thohdieng ha ka por 6:30 janmiet ha SSA Stadium, Polo.
Kane ka kynhun ïalehkai ka nongbah ka bym don jingkyrmen shuh ban rah ïa ka nam lahduh hadien ba ka la mad ïa ka jingïakhaid mar 1-1 kol pyrshah ïa ka Sreenidi Deccan FC ha ka jingïalehkai ba la lah, hynrei ka la khmih lynti ban shim ïa ka kabu ksiar ban pyni ïa ka mynsiem ïakhun hakhmat ki paidbah nongkyrshan.
U coach kane ka kynhun u Birendra Thapa u la pynpaw ka jingkyrmen skhem ba ka kynhun jong u kan lah ban ïalehkai bha ha kane ka jingïalehkai kaba khatduh ha la ïing. “Ngi long ba la khreh ba ngin lah ha ka ban ïalehkai bha lashai ka sngi. Watla ka lah ban don ka jingkylla, hynrei ka jingpynleit jingmut kum ka kynhun ka long na ka bynta kane ka jingïalehkai.”
Kumba ka paw kine ki kynhun ki la ïaryngkat mar 22 poiñ, hynrei ka Lajong ka la tam lyngba ka jinglah ban thep kol bun. Te kumta kine ki kynhun ki donkam ban ïalehkai bha na ka bynta ban ïoh bat ïa ka kyrdan ba-ar ha kane ka lympung. Katba ka Diamond Harbour ka la bat ïa ka kyrdan ba hakhlieh da kaba kamai 28 poiñ.
“Ka Rajasthan United ka long ka kynhun kaba khlaiñ bor, te kumta ngim lah ban kheiñ sting ïa ka bad ki rangïalehkai ki donkam ban ïalehkai bha ha kane ka jingïakhun kaba khatduh.”
Na ka bynta kane ka jingïakhun, ki bor pynïaid ka Lajong ki la pynbna ruh ïa ki tiket lah ban ïoh na Electronic Centre (Khyndailad), Cafe Shil-long (Laitumkhrah) bad na SSA Stadium Ticket Counter (Polo).
