Shillong, Jymmang 14
Hadien ka jinglah ban khur ïa ki hynñiew sien ki nam jop ha ka jingïaid lynti ha ka lympung ïalehkai ka MSL 5 ba la pynlong da ka Meghalaya Football Association, ka Nangkiew Irat SC ka la mad ïa ka jingshah rem da 2-1 kol ha ka Rymbai Shkenshynriah SC, katba ka Langsning FC ka la bteng ïa ka jingjop da 7-0 kol pyrshah ïa ka Maram FC, ha ka Super 8 jong ka Group-B ha ka sngi Palei ha madan MFA kaba ha 3rd Ground, Polo.
Ha ka jingshisha, u Jefferson Pakynteiñ (39′), u la ai jingkyrmen ïa ka Nangkiew Irat da ka u la ïoh ban pynkhih jar nyngkong, hynrei ka kynhun ïalehkai jong ka Shkenshynriah ka la dem hi khui ban ïakhun tyngeh tad haduh ba kan da lah ban pynphai kylla pat da ki artylli syndon ha ka kylla miet lyngba u lyngba u Skilful Tariang (53′) bad u Hesmiki Rymbai (55′) ha kaba kane ka la pynkulmar jingmut ïa ka Nangkiew Irat kat katduh ba ka la mad ïa ka ingshah rem namar kam shym la lah ban pynphai.
Katba ha ka jingïakhun kaba ar, ka Maram FC kam don lad don lynti eiei ba kan lah ban khanglad ïa ka Langsning FC na ka bynta ban ïai bteng shakhmat ha kane ka lympung.
Watla hapdeng kane ka jingïakhun, ka Langsning FC ka la ïoh ban pynkhih jar nyngkong eh hadien shiteng kynta lyngba u Dajiedlang Wanshnong (32) bad bynrap pat sa ka kol na u Andy Joey Laloo (37′) bad hashwa ban kut ka kylla step u Samuel Phawa (45’+1) u la thep ïa ka kol kaba lai.
Haba bteng ïa ka kylla miet, sa shisien pat u Samuel Phawa (51) u la ïoh ïa ka kabu kaba biang ban thep ïa ka kol kaba saw, ïa kaba hadien kane, ka la dei pat sa ka khep jong u Nelson Rymbai ba bat mynta ïa ka nam kum u rangïalehkai ba thep bun kol ha kane ka lympung ba un ïoh ban thep ar kol (54′ bad 69′), kaba pynlong ïa u mynta ban ïoh thep haduh 17 tylli ki kol ha kane ka kynti ba mynta.
Ïa ka kol kaba khatduh pat la ïoh ban thep da u Dajiedlang (80), kaba pynlong ïa ka kynhun ka Maram FC ba kan sngewthuh shai ba haduh katno ka long kaba eh bad ba jwat ynda haba la jam pat sa sha kane kawei pat ka kyrdan jong ka jingïakhun, khamtam haba hap ban mih madan ban ïakhun pyrshah ïa ki klob kiba paw ka nongbah Shillong.
Ha ka sngi Thohdieng ka jingïalehkai kan dei biang na ka bynta ka Group-A ha kaba ha ka por 11 baje mynstep ka Rangdajied United FC kan mih madan ban aireng pyrshah ïa ka Nongkseh SSCC bad ban sa bynrap pat da ka jingïakhun hapdeng ka Mawlai SC pyrshah ïa ka Shillong Lajong FC ka ban long ha ka por 3 baje nohphai sngi. Baroh artylli kine ki jingïakhun kin long ha madan jong ka MFA Ground, Polo.
