Shillong, Jymmang 14
U rangïalehkai phutbol ka Jylla u Ricky Shabong u la don hapoh ka thup jong ka jingpynkhreh na ka bynta ka kynhun ïalehkai ka ri India ban shim bynta ha ka lympung ïalehkai Unity Cup 2026.
Kane ka la wan hadien ka jingpynbna da u coach ka kynhun ïalehkai ka ri u Khalid Jamil ïa ki kyrteng ki 28 ngut ki rangïalehkai, ha ka sngi Palei.
Te kumta kane ka kynhun kan hap ban ïalum lang ha Bengaluru na ka bynta ka prokram kilanmet ynda la dep ka jingïalehkai Indian Super League 2025-26, hashwa ba kin leit sha London ha ka 24 tarik mynta u bnai na ka bynta ka Unity Cup.
Na ka liang u Jamil u la ong, “Ka Unity Cup ka long kaba biang eh na ka bynta jong ngi ban pynkhreh ïa ki lympung ïalehkai kum ka SAFF Championship ka ban long mynta u snem.”
“Ngi la jied ïa ki 28 ngut ki rangïalehkai na ka bynta kane ka jingpynkhreh. Watla ka ISL ka dangïaid, ngi la dangdon ka por ban pynkhreh hashwa ban jied sa tang 23 ngut ki rangïalehkai,” u la bynrap.
Ka India kaba don ha ka kyrdan ba 136 ha ka pyrthei, kan ïakhun pyrshah ïa ka Jamaica kaba don ha ka kyrdan ba 71, ha ka semi final kaba ar ka ban long ha ka 28 tarik mynta u bnai, katba ka Nigeria kaba don ha ka kyrdan ba 26 kan ïakynduh pyrshah ïa ka Zimbabwe kaba don ha ka kyrdan ba 130, ha ka semi final kaba ar ka ban long ha kajuh hi ka sngi. Katba ka jingïakhun final bad ka jingïaknieh ïa ka kyrdan balai (third place) kin long ha ka 30 tarik mynta u bnai.
U Jamil u sngew ba ka jingïalehkai pyrshah ïa ki kynhun ba khlaiñ bor kan long ka jingïarap ban kyntiew ïa ka kynhun. “Ngi ïalehkai pyrshah ïa ki kynhun kiba khlaiñ bor, nga tharai ba kine ki jingïakhun kin ai ka jingshaniah kaba khraw ïa ki nongïalehkai bad kan ïarap ïa ngi ban ïalehkai ha kata ka kyrdan”.
