Shillong, Jymmang 15
U Myntri ba dei peit ïa ka tnat Pule puthi U Bah Lahkmen Rymbui ha ka sngi Palei u la pynpaw ïa ka jingsngewsarong ba ka Shillong Public School ha ka jingïatreilang bad ka Tynrai Academy ki la lah ban plie paidbah ïa ka SPS Tynrai Football Arena kaba don ha Shillong Public School, Laitumkhrah, kane kan dei ka sien jam ban bteng lynti sha khmat lyngba kane ka jingïatrei lang.
Haba kren ha kane ka jingïalang na ka liang u Bah Lahkmen Rymbui u la ai mynsiem ïa ki khynnah pule ban pynleit jingmut ha ki kam ïalehkai namar ka jingïalehkai ka dei kawei na ki ba donkam ha ki khynnah pule. U la ai mynsiem ïa ki khynnah pule ban don ka thong bad ban pynleit jingmut ban kynjoh ïa ka.
Shuh-shuh u la ong ba ka Shillong Public School ka dei kawei na ki skul Sorkar kiba ki khynnah pule ki wad bha, kane ka dei namar ka jingïohi jong ki paidbah ïa ka jinglong ki nonghikai bad ka jinglam lynti jong ki ïa ki khynnah skul ha ka lynti kaba biang kaba pynlong ïa ki ban thrang ban phah ïa ki khun ban pule ha kane ka skul.
U la kyntu ruh ïa ki khynnah skul da kaba ong ba kane ka skul mynshuwa ka dei ka ophis jong ka Deputy Commissioner jong ka East Khasi Hills ha kaba bun bah ki IAS ki la don ha kane ka jaka, ai ba kane kan long ka jingai mynsiem ïa ki khynnah ban trei shitom bad kyrmen ba nangne kin mih ki ophisar ki ban long ki IAS, ki MCS bad da ka jingsarong kin ong ba kane ka skul ka dei ka ïing na ka bynta ki ophisar Sorkar ha ki por barim jong ka East Khasi Hills District.
U la ong ruh ba ka kam ïalehkai mynta kam dei tang ka jingïalehkai sngewtynnad hynrei mynta ka sorkar Meghalaya ka pyntikna ba kino-kino ki ba wanrah takma la ka dei ha ka national, international, Olympic, Asian Games, ne Commonwealth Games, ka kam sorkar ka la don lypa.
Ha kane ka sngi la don lang ruh u Director of School Education & Literacy u Bah Banteilang Kharshandi, MCS, u ba la ong ba ka koit ka khiah bad ka kam ïalehkai ki ïaid ryngkat-ryngkat.
Hadien ba la plie ïa kane ka Madan da u Myntri ka Sorkar Jylla, ka la don ka jingïalehkai paralok hapdeng ka Directorate of School Education & Literacy bad ki khynnah skul ka Shillong Public School.
