Shillong, Jymmang 15
Ka Nongkseh kala jop da ka said ïa ka Rangdajied United FC, katba ka Shillong Lajong FC, kala jop da kaba suk ïa ka Mawlai SC, ha ka jingïakhun quarter final ka lympung 5th Meghalaya State League, kiba la long mynta ka sngi Thohdieng ha madan jong ka MFA, Third Ground, Polo.
Ka jingïakhun ba nyngkong jong ka sngi kaba dei artad jong ka Group A ka long ba ka Nongkseh ka la jop da 2-1 kol ïa ka Rangdajied, ha kaba u Chesterpaul Lyngdoh (22′) bad Aibiangmame Nongneng (90’+4), ki la long ki arngut ki player ban thep ïa ki artylli ki kol na bynta ka Nongkseh bad ïa ka shi kol ka Rangdajied United FC la thep da u Pasborlang Khonglikong (71′).
Ka Rangdajied United ka wan rung sha kane ka jingïakhun kaba ar ka jong ka hadien ba ka la mad ïa ka namrem kaba long da 1-0 kol hakhmat ka SLFC ha ka jingïakhun ba nyngkong.
Haba phai sha ka jingïakhun ba mynta ka sngi ki rang ïalehkai ka Rangdajied ba la coach da u Bah Aiborlang Khongjee, na ka por sha ka por, ki la lah ba kin da tynjuh borbah bha ïa ka kynhun ïalehkai pyrshah ka Nongkseh, katno tam lei-lei haba u Aiborlang u la wanrah ïa ka jingkylla ha ka kynhun ban bujli ïa arngut ki player, kaba hangne lei-lei, kam lah ban khlem da pynking baïong hi ngit ïa ki ‘rang ïalehkai jong ka Nongkseh.
Hynrei ka jingbakla ka Rangdajied ka long ba la shu ai ei palat ïa kiba bun tylli ki freekick hajan la ka jong ka kut bad dei lyngba kawei na ki freekick kaba kum kane, ba ka pynlong ïa ka Nongkseh ba kan da ïoh ban thep ïa ka kol kaba ar lyngba u Aibiangmame.
Haba phai sha ka jingïakhun kaba ar, ki kol ba la thep lyngba u Deibormame Tongper (16′), Riborlang L Lyngkhoi (34′) bad Wilbert Marbaniang (86′), ka la biang pura ïa ka kynhun ka Shillong Lajong FC ba kan pynliem ïa ka Mawlai SC da 3-1 kol, ha kaba ïa ka shi kol jong ka Mawlai la thep da u Basuklang Bina (35′).
Kumta ha kaba kut ki ar kylla jong kane ka jingïakhun, ka Lajong kan khur mynta 6 poiñ, bud pat sa ka Nongkseh kaba la ïoh ban khur 4 poiñ, ka Mawlai 1 poiñ bad ka Rangdajied 0, ha kaba tang artylli ki team ba khur bun poiñ kin khreh ban jam sha ka semi final, hynrei naka bynta ka Mawlai bad Rangdajied ki ba la shah rem na ki jingïakhun ba mynta ka sngi kam pat dei kaba kut ïa ki, hynrei ba ki dang sah ïa ki saw kylla jong ka jingïakhun ïa kaba ki lah ruh wat ban khie khlieh ban ïaknieh jam sha ka semi final.
Lashai pat ka sngi, ki jingïakhun kin dei naka bynta ka Group B ban long ha SSA Stadium, ha kaba ka Maram FC kan ïakhun pyrshah ïa ka Nangkiew Irat ha ka por 2 baje nohphai sngi bad ka Rymbai Shkenshynriah SC kan ïakhun pyrshah ïa ka Langsning FC ban long ha ka por 6 baje janmiet.
