Shillong, Jymmang 17
Ki saw tylli ki kol ba la thep da u Neblejohn Lyngkhoi ki la biang pura ïa ka Nangkiew Irat SC ba kan pynliem noh ïa ka Maram FC da 7-1 kol ha ka Super 8 jong ka 5th Meghalaya State League ba la pynlong da ka Meghalaya Football Association (MFA) ha ka sngi Saitjain.
Katba ha ka jing-ïakhun kaba ar kaba la long ha ka por janmiet, ka Langsning FC ka la pynliem noh da 3-0 kol ïa ka Rymbai Shkenshynriah SC.
U Dibinroy Nong-spung (15) u la lah ban thep kol nyngkong na bynta ka Nangkiew Irat, hynrei u Seiborlang Tado (21′) u la lah ban pynïakhaid kylla na ka bynta ka Maram.
Watla kine ki kynhun ki la ïakhaid mar shi kol, hynrei ka Nangkiew Irat ka la duh noh ïa u Banshanlang Dhar uba la mynsaw bad la mih bujli noh u Sandy Kharkongor, ha kaba marsien ïa ïoh mih, u la ïoh syndon ban thep ïa ka kol kaba ar ha ka minit kaba 27.
Hadien shiteng kynta ka Nangkiew ka la thep biang ïa ka kol kaba lai hadien ba u Noblejohn (39) u la ïoh ban pynbuh bol na ka bynta u Sandy. Une u rangïalehkai shakhmat u la ïoh ban thep ïa ka kol kaba ar jong u na ka bol kaba jong u hadien ka jingïarap pynbuh da Santi Janai Sianglong bad ïa ka kol kaba lai ne hat-trick ka la wan hadien ba u la ïoh ban shut ïa ka penalty ha ka minit kaba 66.
Wat hadien ba la lah ban thep ïa kine ki kol, hynrei ka Nangkiew Irat i kumba kam pat hun mynsiem, ha kaba u L Nonglait (83′) bad u Neblejohn (87′), ki la bteng ban thep ïa ki kol kiba sah, kaba long artad ka jingjop kaba nyngkong ka jong ka hadien ba ka la mad ïa ka jingshah rem ha ka Shkenshynriah.
Ha ka jingiakhun kaba ar kaba la long ha ka por janmiet, ka Langsning FC ka la pynkhih jar nyngkong lyngba u Donlad (14), ïa kaba ym slem hadien kane, ka la ïoh ban thep ïa ka kol kaba ar kaba la wan lyngba u Kyrmenskhem Mukhim (40′) katba ïa ka kol kaba lai bad ba khatduh la thep pat da u Nelson Rymbai (59).
Watla kata ruh, ka la don ki khep kiba ka Shkenshynriah ka la ïoh ïa la ki kabu ksiar jong ka ba ka la jan ïoh pynkhih jar khamtam na ki jingpyrshang u Rihokmi Tyngkan bad u Alwinson Bareh ba la khanglad noh da u rangapkol ka Langsning u Nister Rou Suting.
Ha kaba kut, lada yn ïa phai sha ka miej ïa khur poiñ, ka Langsning FC ka la 6 point bud sa ka Rymbai Shkenshynriah bad Nangkiew Irat kiba la ïoh mar 3 poiñ, kaba hangne wat lada ka Nangkiew Irat ka kham biang ha ka liang ka jingïathep kol (goal difference +5 la -1), hynrei lada leit pat sha ka ‘head to head’, dei ka Shkenshyn-riah kaba don ha ka kyrdan kaba ar.
Ki jingïakhun mynta ka lah sngi U Blei ha ka Group-A kin long hapdeng ka Rangdajied United FC pyrshah ïa ka Mawlai SC ha ka por 2 baje nohphai sngi bad ka Shillong Lajong FC ïa ka Nongkseh SSCC ha ka por 6 baje janmiet.
