Washington, Jymmang:
Uwei u samla 22 snem na India, u la shah pynngat kyndon pynkheiñ aiñ hadien ba u la phla ïa ka jingdon kti jong u, ha ki kam khaïi briew kiba u ju pynpoi na Canada sha United States.
Ia utei u briew la ithuh kyrteng u Shivam, hynrei ym shym la tip pat ïa ka jait jong u, la ong ka tnat treikam jong ka America bad ha ki sakhi ba la ioh lum, la ong ba utei u samla u la phla ba u ju pyniadei ïa ki kam khaïi- be-aiñ ha kylleng u pud u sam jong ka thaiñ ba Shatei jong ka US hapdeng u Lber jong u snem 2024 bad u Jylliew jong u snem 2025, da kaba wanrah be-aiñ ïa ki “nongwei na India” sha u pud u sam jong ka US. Katkum ki kot ki sla jong ka ïingbishar, ka kamram jong u Shivam ka long ban pynbeit ïa ki nongniah kali ban leit kit briew na khappud jong ka Canada bad ban kit ïa ki kham sha ki phang pdeng jong ka ri America, khamtam sha ki ktem ba buh rieh ha kylleng ka thaiñ Shatei jong ka nongbah New York bad sha ki hotel ba pher hapoh Plattsburgh.
“Ha ka 25 tarik u Kyllalyngkot, 2025, u nongshah mudui u la bthah ïa u paralok ba ïatreilang ban pynpoi tuh ïa ki 12 ngut ki nongwei na India bad na United Kingdom na Canada sha ka ri America. U nongshah mudui u la siew ïa u paralok jong u $100 na ka bynta uwei u nongwei uba la pynrung tuh,” ong ka tnat Justice.
La ong ba ha utei u juh hi u bnai, ki pulit pahara khappud jong ka US ki la pyrshang ban pynsangeh ïa ar tylli ki kali kiba ïaid lang hajan khappud jong ka US bad Canada. Baroh ar tylli ki kali ki la pynstet ban kiar na ki agent, kaba la pynmih ïa ka jingbuddien. Kawei ka kali ka la jah na surok bad kam lah shuh ban iaid, katba ïa kawei pat la pynsangeh noh hadien ha Mooers, New York. Ki kali ki don haduh 12 ngut ki briew kiba la wanrah be-aiñ shapoh US.
