Jowai, Jymmang 17
Ka Khimusniang ka la long ka la ban khur ïa ka khusnam pisa kaba T.1,50,000/-, hadien ba ka la long ka lahduh ha ka lympung ïalehkai ‘1st Wailadmiki Shylla Veterans Foot-ball Tournament’ ba la pynïaid da ka National People’s Party-Jowai Block.
Kane ka la wan hadien ba ka la pynliem noh ïa ka Mukhla da 2-1 kol ha ka jingiakhun final kaba la long ha ka sngi Saitjaiñ ha madan Jrisalein Chutwakhu, Jowai.
Ïa kane ka lympung, la pynhap pyrda da u President ka Meghalaya Football Association (MFA) u Bah Hamletson Dohling uba dei ruh u nongaibuit jong u Myntri Rangbah ka Jylla, kum u kongsan ha kaba la ïadon lang ruh u Myntri ka tnat ïalehkai ka Jylla bad uba long ruh u MLA ka thaiñ u Bah Wailadmiki Shylla bad kiwei kiwei.
Haba ai jingkren ha katei ka sngi u Bah Wailadmiki u la ong ba ka madan Jrisaleiñ ka la sei ïa shibun ki ‘rang bad bad ki ‘thei ïalehkai kiba mihkhmat ïa ka rilum Jaiñtia. Kumta ka la dei ka kynti ban pynbha pynmiat ïa ka khnang ba ki khynnah kin wan ban ïalehkai biang ha kane ka madan.
Ha kawei pat ka liang u Bah Hamlet ula aikhublei ïa ka NPP-Jowai Block kaba la shim ïa ka sien jam ban ym klet ïa ki rangbah bad ki khlur ïalehkai barim kiba tbit ha ka jingïalehkai phutbol.
Haba pynpaw ka jingïaroh ïa ki sienjam jong u MLA na ka bynta ka Jowai Constituency da kaba ong, “Phi long kiba donbok shibun ban ïoh ïa u MLA uba stad bad ba shemphang, uba ngi peit ma ngi, un nangkiew bha ha kaba ïadei bad ka jinglong nongïalam ka jong u’.
“Watla ka NPP ka dei ka seng saiñ pyrthei, hynrei kane ka seng kam ju klet pat ban phaikhmat ban peit lang na ka bynta ka imlang sahlang,” labynrap u Bah Dohling.
U Bah Dohling ula ai mynsiem ruh ïa ka NPP-Jowai Block ba kan bteng ïa kane ka lympung manla u snem, khnang ba ki riew rangbah ki bym ïoh ban mihkhmat ba kan dei ka lad na ka bynta jong ki ruh.
Nalorkata, ula ai mynsiem ruh ïa ki rangbah ban bteng ïa ka jingmlien ban ïalehkai namar wei ba la hiar hapoh ka madan, ka la long lypa ka dawai khlaiñ na ka bynta ka koit ka khiah bad ka jingmyntoi ka jong ki.
U Bah Dohling ula pynkynmaw ruh ba ka rilum Jaiñtia ka dei ka dong bad ka thaiñ kaba la sei shibun bah ki rangïalehkai kiba la mihkhmat ïa ka jylla bad ka ri India hi baroh kawei, da kaba u kyntu ruh ïa ki samla ban kin kit khia ïa ka sap ka phong kaba ki don.
Katba ka Mission Compound Loomkyrwiang kala wan ha ka kyrdan balai hadien ba ka la jop da 5-0 kol ïa ka Mihmyntdu-A. Te kumta ka Mukhla kaba la wan ha ka ka kyrdan ba-ar ka la ïoh T.1,00,000/- katba ka kynhun kaba wan balai ka la ioh T.50,000/- ryngkat ki takma bad ki trophy.
