Shillong, Jymmang 18
Ka Ïaitylli S&CC ka la pynliem noh ïa ka Laitlyngkot SC da 2-1 kol na ka bynta ban khur jingjop ha ka lympung ïalehkai U-20 4th Division Football League 2026 ba la pynïaid da ka Shillong Sports Association ha ka lah sngi U Blei ha madan MFA kaba ha Polo.
Kane ka nam jop ka la wan urlong lyngba ki ar kol ba la thep da u Banbisharlang Mawlong ha ka minit kaba 25 bad u Jovialson Kharnaïor ha ka minit kaba 30 hashwa ba u Namebantei Nongkynrih (43) un pynphai kylla shi kol na ka bynta ka Laitlyngkot ha ka kylla step.
Haba phai sha kawei pat ka jingïalehkai kaba la long kham hashwa hapdeng ka Gorkha Association bad ka Ïateilang SC ki la ïasam mar shi poiñ hadien ba ki la ïakhaid mar 1-1 kol.
Ha kane ka jingïakhun ka Ïateilang SC ka la pynkhih jar nyngkong eh lyngba u Teiborlang Kharsahnoh ha ka minit kaba 15, hynrei hadien shiteng kynta ka Gorkha ka la lah ban pynïakhaid kylla lyngba u Leric Kordor Nongkynrih (36).
Kane ka lympung kan bteng biang ha ka sngi Ba-ar hapdeng ka Riatsamthiah SC pyrshah ïa ka Imson SC ha ka por 1 baje mynstep, katba ka Lumkseh SC ïa ka Them Rangshken SC ha ka por 4 baje janmiet. Kine baroh ar ki jingïakhun kin long ha madan MFA.
