Moscow, Jymmang:
Ka tnat Embassy jong ka India hapoh Russia, ha ka Sngi U Blei ka la pynbna ba uwei u nong India, la ong ba u la ngat lang bad duh noh ia ka jingim ha ryngkat bad 2 ngut kiwei pat kiba khlad na ka jingleit thombor jong ki drone ka Ukraine sha ka nongbah Moscow jong ka Russia.
“Uwei u nong India u la duh noh ia la ka jong ka jingim bad 3 ngut kiwei pat ki la mynsaw ha ka jingleit thombor jong ki drone ka Ukraine sha ka nongbah Moscow ha ka Sngi U Blei”, la ong ka tnat Embassy ha katei ka kyrwoh.
Ki heh jong ka Embassy ki la leit jngoh ia ka jaka ba la jia katei ka jingshah thombor bad ki la ioh ruh ban iakynduh ia ki nongtrei kiba la mynsaw ha katei ka hospital.
Namar la ong ba jan kumba 600 tylli eiei ki drone ki la lei ban thombor ïa ka Russia, ha katei ka miet baroh shi miet, ha kaba 3 ngut ki la ïap natei ka jingthombor ha ka nongbah Moscow bad uwei pat u la khlad ha ka nongbah Belgorod, ha kaba ki bor synshar jong ka Ukraine, ki la ong ba ka dei ka jinghiar thma kaba khraw tam ha ka nongbah ha ka por jong ka jingïakynad.
Hynrei la ong ba kane ka wan jia tang katto- katne sngi hadien ba ka jingleit thombor jong ki shipai Russia da ki ‘namding bad ki drone ïa ka Ukraine, ka la shim ym duna ïa ka 24 ngut ki briew ha ka nongbah jong ka Ukraine, ka jinghiar thma kaba ka Ukraine ka la byrngem ban siew kylliang bad kput beit-beit ia ka Russia kumba ka leh ia ka.
Da ka jingpynshlur da ka jinghiar thma kaba pura jong ka Russia ha u snem 2022, ka jingïakynad ha Ukraine ka la pynïap da ki spah hajar ngut ki briew bad ka la nang kiew sha ka jingïaleh-kai kaba shyrkhei tam ha Europe naduh ka thma bah ba ar.
