Dubai, Jymmang:
Ki heh jong ka Abu Dhabi, ha ka Sngi U Blei, ki la iathuh ba kawei ka drone ka la leit thombor bavd pyn julor ia ka shlem ‘Nuclear’ jong ka United Arab Emirates (UAE) bad la ong ba kane ka jingjia ka wan jia ha kum kane ka por ba ki jingpynbeit bad jingiakren iasuk ki dang ïaid shakhmat ban ia pynkut noh ia ka jingiakynad hapdeng ka Israel-US bad ka Iran.
Ki heh jong ka UAE kim shym la kynnoh ia katei ka jingshah thombor bad ym shym la don kano kano ka jingkynthoh mardor. Ka UAE ka la kynnoh mynshwa ia ka Iran ba ka la hiar thma ia ki jingthmu jong ka ha kaba ka la khot ka jingpynjur ia ka jingialeh ha katei ka thain.
Katei ka drone, ka la tynrah ia kawei ka generator elektrik, kaba don shabar jong ka Barakah Nuclear Power Plant, ong ka ophis jong ki lad pathai khubor jong ka Abu Dhabi. Ka jingshngaiñ bad ki jingtreikam jong ki radio kim shym la shah ktah bad ym shym la don kano kano ka jingmynsaw, la ong ka khubor.
Ka International Atomic Energy Agency ka la ong ba ka dang bud dien bha ïa kane ka jinglong jingman.
Ha ka thma kaba la sdang da ka jinghiar thma jong ka US bad Israel pyrshah ïa ka Iran ha ka 28 tarik u Rymphang, ka Iran ka la thombor bunsien ïa ka UAE bad kiwei kiwei ki ri Gulf kiba don ïa ki jaka sah shipai jong ka US, da kaba hiar thma ïa ki jaka kiba kynthup ïa ki riew paidbah bad ki jaka pynroi bor ding.
Ka Iran, ka la pynjur ïa kum kine ki jinghiar thma ïa ka UAE, ha kaba sdang jong une u bnai, hadien ba U Donald Trump, U President jong ka US, ula pynbna ïa ka jingthmu jong ki shipai duriaw, ban pyrshang ban plie ïa ka Strait of Hormuz, ha kaba u Trump, ula pynsangeh noh, hadien 48 kynta.
