Shillong, Jymmang 18
Ka Nongkseh SSCC ka la jam sha ka kyrdan ba hakhlieh duh ha ka Group-A (Super 8) jong ka 5th Meghalaya State League, hadien ba ka la lah ban pynliem noh ïa ka Shillong Lajong FC da 2-0 ha ka jingïakhun quarter final ha ka lah sngi U Blei ha SSA Stadium kaba ha First Ground, Polo.
Kane ka la wan urlong lyngba ki kol ba la thep lyngba ki rangïalehkai barim ka SLFC, u Sheen Stavenson Sohktung (67′) bad u Mebankhraw Wahlang (69′).
Hynrei shwa ïa kane ka jingïakhun, ka Mawlai SC ka la lah ban khur ïa ka nam jop ba nyngkong jong ka ha kane ka kyrdan ïakhun, hadien ba ka la lah ban pynliem noh ïa ka Rangdajied United Fc da 2-1.
Haba phai biang sha ka jingïakhun hapdeng ka Nongkseh bad ka Lajong, la wan ban sakhi da ki nongkyrshan, katba hapdeng madan dei kine ki kynhun ki ban shim ïa ka rai jong ka nam jop, hyneri kim shym la lah ban thep kol ha ka kylla step.
Ha ka kylla miet, ka Nongkseh ka la sdang ban ïakhun tyngeh ha kaba ka la pynlong syndon ïa u Sheen bad Mebankhraw ban pynkhih jar na ka bynta ban pynlong ïa ki nongkyrshan ka Nongkseh ban shad kmen.
Kumta ha kaba kut ka jingïakhun, ka Nongkseh ka la khur 7 poiñ na ki lai sien ïakhun, katba ka Lajong ka la don ha ka kyrdan kaba ar bad kamai 6 poiñ.
Haba phai sha kawei pat ka jingïakhun kaba la long kham hashwa, ka Mawlai ka la pynkhih jar nyngkong lyngba u Basuklang Bina (39′) bad ïa ka kol kaba ar la thep da u Kevin Rymbai (61′) hashwa ba ka Rangdajied United kan pynphai shi kol lyngba ka penalty ba la shut da u Mebannangkiew Thabah (45’+1).
Da kane ka nam jop, ka Mawlai ka la kamai 4 poiñ na ki lai sien ïakhun, katba ka Rangdajied kam pat lah ban kamai poiñ, hynrei ka lynti ïaid sha ka semi final ka dangjngai ïa kane ka kynhun.
Ha ka sngi Ba-ar ka jingïalehkai jong ka Group-B ka long hapdeng ka Nangkiew Irat FC pyrshah ïa ka Langsning FC ha ka por 2 baje nohphai sngi bad ha ka por 6 baje janmiet ka Maram FC ïa ka Rymbai Shkenshynriah SC.
