Shillong, Jymmang 18
Ki heh jong ka ‘media rights’ ka FIFA ki la wan sha India mynta ka taïew watla ka World Cup 2026 ka dangsah sa tang shi bnai sdang noh ïa ka ha Canada, Mexico bad United States.
Ki tyllong khubor ki ïathuh ba ka jingthmu jong kane ka kynhun ka long halor ka jingbym don ki ban wan shakhmat ban ïasoi bad ban pynbna paidbah ïa ka jingpynïaid ïew ïa kane ka lympung ïalehkai kaba heh jong ka pyrthei na ka daw ki jingïapher ha ka jingsiew.
Kumba ka long mynta ki don da ki million ngut ki nongkyrshan jong kane ka jingïalehkai phutbol ha ri India hynrei kan long ka jingduh kaba khraw ïa ki paidbah kiba kwah ban sakhi ïa kane ka lympung ïalehkai kaba heh duh ha ka pyrthei.
Ka China Media Group, kaba long ka nonglamkhmat jong kane ka synjuk pynïaid ïew ïa ki jingpathai khubor ïalehkai, ka la mynjur ïa ka jingïateh kular ban pynphriang ïa ka World Cup ha ka taïew ba la dep bad ban pynkut noh ïa ka jingbym lah ban pynurlong ïa ka hok ban pynïaid ïew.
Ki khubor ki ïathuh ba ïa ka jingthmu jong ka FIFA ban phah ïa ki dkhot ka ‘media rights executive’ sha India, kim shym la long kaba shai ïa ki mat jong ka.
Ha kawei pat ka thymmei khubor, la ong ba ka FIFA ka la pynkut ïa ki jingïateh bad ki kompani ban pynïaid ïew ha ki 180 tylli ki territory bad ka la ïakren ha India halor ki hok jong ka jingpynïaid ïew (media rights) bad haduh mynta kim pat long kiba shai.
Ki jingïakren hapdeng ka Reliance-Disney, ka kompeni pathai khubor kaba heh tam ha India bad ka FIFA kim shym la urlong satia, bad ka Sony, kawei pat ka nongpynïaid ïa ki jingïalehkai, kam shym la wan shakhmat ban buh ïa ka thong. Na ka liang ka Reliance-Disney ka la tyrwa $20 million na ka bynta ka hok pynïaid ïew jong ka FIFA. Hynrei kane kam shym la urlong namar ka FIFA ka la buh haduh $100 million hynrei kaba khatduh ka la tyrwa $60 million, la ïathuh ki khubor.
Haduh mynta ym pat lah ban tip la ka FIFA kan ïakynduh bad ka Reliance-Disney namar kane ka kompani ba la lamkhmat da u Mukesh Ambani, u la kyntait ban ai ïa kano kano ka jubab.
Kane ka lympung ïalehkai World Cup kan sdang ha ka 11 tarik u Jylliew, ha kaba ka dangsah sa tang lai taïew ban pyndep pura ïa ka jingïateh kular halor ki jingpynïaid ïew ïa kane ka lympung bad kiwei kiwei ki jingdonkam.
Ki don kumba 85 million ki nongkyrshan ïa ka jingïalehkai phutbol hapoh ri India, hynrei watla katta ki dangduna namar ha ka kriket ki don kumba 492 million ngut ki nongkyrshan, katkum ka kaiphod jong u snem 2024 na ka Deloitte.
