Shillong, Jymmang 20
Ka Nongkseh SSCC bad ka Shillong Lajong FC ki la ïakhaid da 1-1 kol ha ka jingïakhun jong ka Group A ha ka kyrdan Quarterfinal jong ka 5th Meghalaya State League kaba la long ha madan SSA ha ka 20 tarik Jymmang 2026.
Watla kine ki ar tylli ki kynhun ki dang dep ïakhun tang ha kine ki ar sngi ba la dep, ha kaba ka Nongkseh ka la jop da 2-0 kol, hynrei ka jinglong jingman kam shym la pjah noh, ha kaba ki paidbah nongkyrshan na baroh arliang ki la tur biang sha madan ban ai mynsiem ïa la ki jong ki kynhun.
Ka Nongkseh ka la thep kol nyngkong lyngba u Mebankhraw Wahlang (33′) ka dei kaba la wan na ka korner ba la shim da u Hardy Cliff Nongbri. Hynrei ka Lajong ka la lah ban pynïakhaid tang hadien katto katne minit da ka kol lyngba u Fridison Wanniang (37′).
Watla ka jingïalehkai ka la kut noh ha ka jingïakhaid, hynrei kine ki ar tylli ki kynhun ki la dep ai ïa ngi ar tylli ki jingïalehkai kiba itynnad shibun kiba dei hok ban ïohi ha ka phainal.
Ha kawei pat ka jingïakhun, ka Mawlai SC kaba dang ïai bteng ïa ka nam lahduh ka la pyni ïa ka sap kaba bha tam jong ka ha ka kyrdan jong ka Quarterfinal ban pynliem noh ïa ka Rangdajied United FC da 4-0 kol. Hadien ba ka la shah rem saw sien lynter, ka Rangdajied kam lah shuh ban angnud ban rung sha ka semifinal watla ka dang don ar tylli ki jingïalehkai ban ïakhun.
Ka Mawlai ka la thep kol lyngba u Basuklang Bina (14′, 39′), u Fairming Suting (66′) bad u Samlang Rympei (90’+4). Ka jingjop ka la pynpoi ïa ki sha ka kyrdan ba ha khlieh duh jong ka Group B.
U Basuklang u la don ha ka jingjop ban thep kol bad ki ar tylli ki kol jong u mynta ka sngi ki la pynlong ïa u ban long u nongthep kol ba bun tam jong ka Mawlai ha kane ka MSL da kaba thep hynriew kol.
Haba phai sha ka kyrdan jong ka thup, ka Nongkseh ka lamkhmat da 8 poiñ, ka Lajong ka wan ba ar da 7 poiñ, ka Mawlai ka wan ba lai da 7 poiñ bad ka Rangdajied 0 poiñ.
Ha ka 21 Jymmang 2026 ka Group B kan rung sha ka jingïakhun kaba ar bad ka Rymbai Shkenshynriah SC kan ïakhun pyrshah ïa ka Maram FC ha ka por 2 baje janmiet. Nangta ka Langsning FC kan ïakhun pyrshah ïa ka Nangkiew Irat SC ha ka por 6 baje janmiet.
