Shillong, Jymmang 21
U coach ka kynhun ïalehkai phutbol ka India u Khalid Jamil u dangkwah ban wanrah sa kumba lai ngut ki rangïalehkai kiba dangïalehkai shabar ri bad kiba kloi ban bud ïa ki dienjat jong u Ryan Williams bad ban mihkhmat ïa kane ka kynhun ha ki lympung ki ban wan.
U Williams, ba la 32 snem ka rta, u la aiti noh ïa ka jinglong nongshong shnong jong ka Australia bad u la shim ruh ïa ka passport jong ka ri India kaba pynlong ïa u ban ïoh ban mihkhmat ïa ka kynhun ïalehkai ka ri. Ka jingpynrung ïa une u rangïalehkai ka Bengaluru FC ka la long ka jingïarap ïa ka kynhun ban pynkhlaiñ ha ka bynta kaba shakhmat.
“Shisien ba ngi la pynrung ïa kine ki rangïalehkai, kan don ka jingïakhun kaba kham itynnad ha kylleng ki lympung,” la bynrap u Jamil. “U Williams u la plie ïa ka jingkhang na ka bynta kiwei pat ki para nongïalehkai kiba dangïalehkai shabar ri.”
Utei u coach ka India um shym la pynpaw ïa ka jinglong ne kyrdan jong ki nongïalehkai. Da ka jingshongthait jong u Sunil Chhetri na ka kam ïalehkai bar ri, une u rangïalehkai shakhmat u danglong hakhmat eh. “Nga kwah ban ïohi ïa ki rangïalehkai kiba biang. Ngin peit ïa ki nongïalehkai katkum ki kyrdan kiba ngi kwah ban pynkhlaiñ. Ki don lai ngut ki rangïalehkai bad mynta ngi dangap ïa ki kot ki sla jong ki,” u la bynrap.
