Dhaka, Jymmang:
Uwei u nongmihkhmat jong ka ri India uba don ha kawei ka mission jong ka India ha Bangladesh u la shah lap ba u la iap hapoh ka jaka jong katei ka mission, la iathuh ki pulit. La iathuh ba ïa ka met jong u Naren Dhar, uba dei u ophisar jong ka Protocol, la sei mynta ka step na Indian Assistant High Commission ha Chittagong.
Hadien kata la phah noh ïa ka metïap sha ka jaka buh ïa ki met ïap ha Chittagong Medical College (CMC) Hospital ban leh ïa ka post mortem. Ka daw kaba thikna jong ka jingiap jong u kam pat paw shai haduh mynta.
“U Dhar u trei kum u Protocol Officer ha Indian Assistant High Commission. Mar ïa ioh ïa kane ka khubor, ki pulit ki la leit sha katei ka jaka bad ki la sei ïa ka met jong u ha ka por kumba 9:30 baje mynstep, hadien kata la phah ïa ka sha CMC Hospital mortuary ban leh ïa ka autopsy,” la ong u Assistant Commissioner jong ki pulit jong ka sorbah Aminur Rashid.
U la ong ba une u heh sorkar u la don ha ka rta kaba 30 snem shaneng. La lap ïa ka met jong u, ha khmat ka jingkhang jong ka kamra shet jingshet, ha ka por mynstep ha ka mala kaba ar jong ka iing visa centre kaba rim jong ka tnat treikam jong ki nongmihkhmat.
Ki tyllong khubor sorkar ki iathuh ba ka High Commission ka dang iakynduh bad kiba ha iing jong utei u heh sorkar. Ka Indian High Commission ha Dhaka lane ka Assistant High Commission ha Chattogram haduh mynta kim shym la kren eiei eiei halor katei ka jingiap, ha kaba ki pulit ha kaba nyngkong ki la suba jur ba ka lah ban dei na ka daw jong ka jingkhlad ka dohnud.
Ki pulit ki la iathuh ba katkum ki jingtip ba la ioh lum, u Dhar u dei na ka thaiñ Chandigarh. Ka jingtohkit halor kane ka kam ka dang iaid shakhmat, bad dang ap ïa ka kaiphod jong ka jingpeit bniah ïa ka met jong u, ban lap ïa ka daw bad ki jingshitom lane jingmynsaw kiba don ha ka met jong u.
