Shillong, Jymmang 21
Ka shi kol ba la thep da u Dominic Ryngksai ka la biang pura ïa ka Madanryting SC ban pynliem noh ïa ka Mawlyngngad SC da 1-0 kol ha ka lympung ïalehkai U-20 4th Division Football League 2026 ba la pynïaid da ka Shillong Sports Association ha ka sngi Palei.
Ha kane ka jingïakhun kaba la long ha madan Third Ground, u Dominic u la ïoh ban thep ha ka minit kaba 46 na ka bynta ban pynlong ïa ka Madanryting ban khur ïa ki lai poiñ.
Haba phai sha kawei pat ka jingïakhun kaba ar hapdeng ka Nongthymmai N SC ka la ïakhaid mar 3-3 kol bad ka Golflink SC.
U Ribanshan Wahlang u la thep ar kol na ka bynta ka Golflink ha ka minit kaba 9 & 34 bad kawei pat la thep da u Debian Suting (31). Katba na ka liang ka Nongthymmai la thep da u Ïaisynrop Syiemlieh (22) bad u Hamarbadon Nongrum (65 & 67).
Ka jingïalehkai mynta ka sngi Thohdieng kan long hapdeng ka Nongpiur SS&CC pyrshah ïa ka Mawphlang SC ha ka por 1 baje mynsngi, katba ka Pynthorbah SC ïa ka Mawshbuit SC ha ka por 4 baje nohphai sngi.
