Shillong, Jymmang 21
Ka Nangkiew Irat SC ka la lah ban wanphai da ka jingkhlaiñ bor ha ka lympung ïalehkai 5th Meghalaya State League da kaba ka la lah ban pynliem noh ïa ka Langsning FC da 3-1 kol ha ka sngi Palei ha SSA Stadium, Polo.
Kane ka la wan lyngba u Wallamsuk Nongkhlaw (25′) lyngba ka penalty na ka bynta ka Nangkiew Irat, hynrei u Kyrmenskhem Mukhim (42′) u la lah ban pynphai kylla na ka bynta ka Langsning hashwa ban kut ka kylla step. U Wallamsuk u la pynbud biang ïa ka kol kaba ar ka jong u na ka bynta ka Nangkiew ha ka minit kaba 50 hashwa ba u Justerwell Tham (81′) un thep ïa ka kol kaba khatduh bad ban khur syndon ïa ka jingjop.
Watla haduh ka jingïalehkai ba la lah, ka Langsning ka la lah ban khur ïa ka jingjop kaba shiphew sien lynter ha ka MSL, hynrei kam shym la lah ban bteng biang ïa ka nam jop kaba khatwei. Ha ka wat kaba nyngkong, ka Langsning ka la lah ban pynliem ïa ka Nangkiew Irat da 6-1 kol ha ki ar sngi ba la lah.
U rangapkol ka Nangkiew Irat u Emerald Dan u la shah tynjuh bor ar sien kiba la dei ban shah thep, pynban u la lah ban khanglad na ka jingshah thep. Hynrei ka Nangkiew ka la ïoh ïa ka kabu kaba biang hadien ba u Wallamsuk u la shah pynur hapoh box. Te kumta une u rangïalehkai shakhmat um shym la pynlehnohei hadien ba u la shut ïa ka penalty bad u rangapkol ka Langsning u Rajat Paul Lyngdoh um shym la lah ban khanglad.
Ka Langsning ka la pynmih katto katne ngut ki rangïalehkai ha ka bynta kaba shakhmat,. U Kyrmen u la ïoh ban mih madan, ha ryngkat u Dajiedlang Wanshnong, uba la shim ïa ka corner kaba u Kyrmen u la ïoh ban pyndei da ka khlieh.
Watla ka Langsning ka la ïoh katto katne ki kabu kiba biang, hynrei kam shym la lah ban pynurlong. U Wallamsuk u la ïoh ban thep biang ïa ka kol kaba ar hadien ba u Rajat Paul u la ïaleh ban khanglad. Watla u Manbhalang Nongmin u la pyrshang ban teh lakam, hynrei utei u rangïalehkai ka Nangkiew um shym la pynlehnohei ïa kane ka kabu ksiar kaba u la ïoh ban pyndei da ka khlieh.
Ïa ka kol kaba lai jong ka Nangkiew la thep da u Justerwell hadien ba u Neblejohn Lyngkhoi, u la ïoh ban shut nyngkong bad kam shym la rung.
Haba phai sha kawei pat ka jingïalehkai kham hashwa, ka Rymbai Shkenshynriah SC ka la khur jingjop da 6-2 kol ïa ka Maram FC, kaba don shatrai. U Ïaishah Bareh (3′, 52′, 75′) u la khur ïa ka hat-trick, ïa ki ar kol la thep da u Hesmiki Rymbai (19′, 90’+5) bad u Niponghi Sumer (20′). Katba na ka liang ka Maram ka la lah ban pynphai kylla lyngba u Seiborlang Tado (53′) bad u Santosh Teron (77′).
Ha ka wat kaba nyngkong, ka Shkenshynriah ka la jop teng ïa ka Maram da 4-2 kol.
Kumba ka long mynta ka Langsning ka dangbteng ha ka ban lamkhmat ha ka Group-B ha kaba ka la ïaryngkat mar 9 poiñ bad ka Shkenshynriah. Ka Nangkiew Irat ka la wan ha ka kyrdan balai bad 6 poiñ bad ka while Maram (0) ka la don ha ka kyrdan ba shatrai.
Ki jingïalehkai jong ka Group-A mynta ka sngi Thohdieng kin long hapdeng ka Nongkseh SSCC pyrshah ïa ka Rangdajied United FC ha ka por 2 baje nohphai sngi, katba ka Shillong Lajong FC ïa ka Mawlai SC ha ka por 6 baje janmiet. Ka Nongkseh ka la jop teng ïa ka RUFC da 2-1 kol ha ka wat kaba nyngkong bad ka Lajong ka la jop teng ïa ka Mawlai da 3-1 kol.
