Islamabad, Jymmang:
Katkum ki khubor, la ong ba kawei ka liengsuiñ JF-17 iapom jong ka tnat Pakistan Air Force ka la leit hap bakla hapoh ka thaiñ Pakistan Aeronautical Complex (PAC) jong ka thaiñ Kamra hapdeng ka jingai jinghikai bad kaba la wanrah biang sa shisien pat ïa ka jingbuh jingkylli haba iadei bad ki tiar ïakhun jong ka China kiba la pyndonkam da ka Pakistan.
Katkum ki kaiphod ba la ioh lum, la ong ba katei ka liengsuiñ ka la leit noh beit- beit sha ryngkew tang hadien ba la lap ba ka don jingthud ha ki kor treikam jongka. Watla katta, la ong ba ym shym la don ki riew paidbah ne ki briew na katei ka jaka ba hap katei ka liengsuiñ, ki ban ngat ne mynsaw ha katei ka jingjia.
Ha ki video ba la saphriang paidbah online, la iohi ïa katei ka liengsuiñ kaba la mih tdem hashwa ba kan hap noh sha ryngkew bad la iohi ruh ïa ki pilot kiba la kynthih noh da ki parachute ha ka por ba ka liengsuiñ ka la noh shapoh.
Tang mar kumta hi la iohi ïa ki paidbah nongshong shnong jong katei ka jaka, ba ki ïa leit ban mareh sha katei ka jaka ban iarap ïa kitei ki pilot kiba la mynsaw hajan ka jaka ba la hap katei ka liengsuiñ.
