Shillong, Jymmang 21
Ka kynhun ki ‘thei ïalehkai kriket U-23 ka Jylla hapoh ka jingkhmih da ka Meghalaya Cricket Association (MCA) ki la leit ban ai da ka jingujor hakhmat ka Meghalaya State Commission for Women (M.S.C.W.) pyrshah ïa u Coach bad u Manager jong ka kynhun halor ki jingkren kynshleiñ, kren tohmet, ka jingphah ïa ki message bym sngew tynnad lyngba ki whatsapp bad wat ban jrong kti ruh ïa ki.
Kane ka jingjia ka la jia ha ka por ba katei ka kynhun ki ‘thei ïalehkai U-23 ka Jylla ka leit shim bynta ha ka lympung ïalehkai jong ka BCCI, ka U-23 Women’s T20 Trophy 2025-26 (plate group).
Haba ïakren bad ka nongthoh khubor, ka Chairperson jong ka MSCW ka Kong Ïamonlang Syiem ka la pynpaw ba ka Commission ka la shim khia bha halor ka kane ka kam kaba la ktah bha ïa ka burom ka ijot jong ki kynthei hadien ba katei ka kynhun ki ‘thei ïalehkai ka la ai da ka jingujor pyrshah ïa u Coach bad u Manager jong ka kynhun.
Te kumta mar syn ïohpdiang ïa ka jingujor, ka Commission ka la pan ïa ka kaiphod kaba pura na ki nongïalam barim ka MCA kata na u Naba Bhatacharjee (President barim), u Secretary Bah Raynold Kharkamni, u Treasurer barim u Dhru-bajyoti Thakuria. Kane ka Commission ka la pan jingpynshai ruh na ki halor ka jingbym shim khia halor katei ka jing-jia, wat hadien ba la ujor ïa kane ka jingjia sha ki.
Ka Kong Ïamonlang ka pynpaw ba kane ka kam ïa mynta ka la don hapdeng ka jingtohkit jong ka Commission bad kin dangbteng ban shim khia bha da kaba khot hajir ïa kitei ki nongïalam barim jong ka MCA.
Ha kawei pat ka tyllong khubor la ïathuh ba u Coach bad Manager ruh ki la shah khot hajir lang hakhmat ka Commission.
Haba pyrshang ban wad jingtip na ki nongïa-lam ka MCA, u Secretary Bah Rayonald Kharkamni u la pynpaw ba um shym la ïoh kano kano ka jingujor na ka kynhun ïalehkai U-23 halor ki jingshah kren kynshleiñ kren toh-met ha u Coach bad Manager. “Ki don ar tylli ki lympung ïalehkai U-23 kiba ngi la phah leit shim bynta. Kawei ka dei U-23 Women’s T20 Trophy 2025-26 (plate group) kaba la long ha Chan-digarh ha ki hynriew bnai mynshwa bad kawei pat ka long ha Sikkim.”
“Lada u Coach bad Manager ki don kti ha katei ka kam, ai ka aiñ kan leh la ka bynta pyrshah ïa ki, u la bynrap”
Lah ban kdew ba ka dei ka sien kaba nyngkong eh ba ka MCA kan ïoh ka jingshah ujor naduh ba ka la ïoh ka jingithuh pura na ka BCCI ha u snem 2018.
