Shillong, Jymmang 22
Ka Nongkseh SSCC bad ka Shillong Lajong FC ki la lah ban pynthikna ban jam sha ka semi final na ka Group-A ha ka lympung ïalehkai 5th Meghalaya State League hadien ba ki la khur jingjop ha ka sngi Thohdieng.
Ha kane ka jingïakhun jong ka quarter final league ne Super 8, ka Nongkseh ka la lah ban pynliem noh ïa ka Rangdajied United da 4-1 kol, katba ka Lajong ka la pynkut noh ïa ka jingïaid lynti ka lahduh jong ka MSL, ka Mawlai SC da 1-0 kol bad ïa kane la thep da u Fridison Wanñiang ha ka minit kaba 72.
Haba phai sha kane ka group, ka Nongkseh ka la ïoh ban lamkhmat da kaba ka la kamai 11 poiñ, katba ka Lajong kaba la wan ba-ar ka la ïoh 10 poiñ, ka Mawlai (7 poiñ) ka la wan ha ka kyrdan balai bad ba khatduh ka RUFC (0 poiñ). Watla ka dangsah sa mar shisien ïakhun, hynrei kane ka jingshah rem ha ka Lajong kan ym don jingkyrmen shuh ïa ka Mawlai ban ïoh rung sha ka ‘Top 2’ wat lada kan pynliem noh ïa ka Nongkseh ha ka lah sngi U Blei bad ka SLFC kan shah rem noh ha ka Rangdajied.
Kumba ka paw ka Maw -lai kam shym la lah ban ïalehkai bha ha ka bynta kaba shadien naduh ka kylla step, hynrei ka la pyrshang ban ïakhun tyngeh. U rangapkol kane ka kynhun u Lambhamiki Lamare u la shah thom naphang, naduh ka minit kaba nyngkong ha kaba u Deibormame Tong-per u la ïoh ban shut tyngeh. U Fridison la dei ban leh kumjuh ha ka minit kaba 20, hynrei ka Mawlai ruh ka la ïoh ïa la ka jong ka kabu, ha kaba u Fairming Suting u la pyndei ïa u diengkol ha ka minit kaba 12.
Baroh ar tylli ki kynhun kim da lah bha ban ïalehkai na ka daw ka jingshah sospon ki rangïalehkai kiba kynsai, hynrei ka Lajong kam shym la ailad ïa ka liang pyrshah. U coach kane ka kynhun u Bah Bobby L Nongbet u la wanrah ïa u Emanbha Marbaniang ha ka kylla miet bad ka jingïalehkai kaba nyngkong jong u ka long ban ïatrei lang bad u Fridison.
Kham hashwa u Banpynkhrawnam Nongkhlaw (30′) u la ïoh ban thep ïa ka kol kaba nyngkong eh jong u ha kane ka lympung, hynrei ka Nongkseh ka la hap ban ap haduh ka kylla miet ba kan khur ïa ka jingjop.
Te kumta u Khraw-kupar Jana (56′, 63′) u la ïoh ban thep ar kol, katba ïa ki shi kol la thep da u Sheen Stevenson Soh-ktung ha ka minit kaba 59, hashwa ba u Pasborlang Khonglikong (76′) un pynphai shi kol na ka bynta ka Rangdajied.
Ïa ka jingïalehkai jong ka Group-B yn pynkut mynta ka sngi Saitjaiñ. Ha ka por 2 baje nohphai sngi ka Nangkiew Irat SC kan ïakynduh pyrshah ïa ka Maram FC bad ka Lang-sning FC ïa ka Rymbai Shkenshynriah SC ha ka por 6 baje janmiet. Ha ki jingïalehkai ba la ïakynduh teng ha ka wat kaba nyngkong, ka Nangkiew ka la jop da 7-1 kol bad ka Langsning ka la jop da 3-0 kol.
