Shillong, Jymmang 24
Ka jingïaid lynti ka kynhun ïalehkai ka Jylla ha ka lympung ïalehkai Swami Vivekananda U-20 Men’s National Football Championship 2026, ka la poi sha kaba kut hadien ba ka la shah rem noh ha ka Kerala da 2-1 kol ha ka jingïakhun quarter final kaba la long ha ka step jong ka sngi Saitjaiñ ha Narainpur, Chhattisgarh.
U Mebanlamlynti Masharing u la pynkhih jar nyngkong na ka bynta ka Meghalaya hapoh 20 minit, hynrei ka Kerala ka la ïakhun kat haduh ba ka la lah ban pynphai kylla ar kol bad ban khur syndon ïa ka jingjop.
Kumba ka paw ka Meghalaya kam shym la lah ban bteng ïa ka jingjop kumba ka la lah ban pynliem ïa ka Kerala ha ka U-20 Men’s NFC ha u snem ba la lah.
Ha kane ka jingïakhun u Mebanlamlynti, uba la thep 7 kol ha baroh san tylli ki jingïalehkai ba la lah, u la hiar sha madan da ka jingthmu ban ïoh thep kol biang, hynrei u rangapkol ka Kerala u la lah ban ïashan tyngeh ban pyllait na ka jingshah thep. Hynrei ka jingbym lah ban shim rai da utei u rangapkol lem bad u rangïalehkai ‘dien ka la pynlong ïa u Meban ba un ïoh ïa ka kabu kaba biang ban thep kol na ka bynta ka Meghalaya ha ka minit kaba 17.
Hynrei tang hadien katto katne por ki rangïalehkai ka Meghalaya ki la kum bakla ha ka bynta kaba shadien, ha kaba ka Kerala ka la ïoh kylla ban pynïakhaid. Kane ka dei na ka daw ka jingbakla pashat ïa ka bol sha u rangapkol u Jovialstar L Lyngkhoi, ha kaba u Sheril Thomas u la ïoh ïa ka kabu kaba biang ban thep kol ha ka minit kaba 26.
Ka Kerala ka la pynbud biang ïa ka kol kaba ar hashwa ban kut ka kylla step lyngba u Calwin Thomas (44′) hadien ba ki rangïalehkai ‘dien ka Meghalaya kim shym la lah ban khanglad na ka jingshah thep.
Watla ka la mad ïa ka jingshah rem, hynrei ka mynsiem ïakhun ki rangïa-lehkai ka Jylla ki la lah ban pynpaw naduh kaba sdang ka jingïakhun jong kane ka lympung ha kaba ka la pynliem ïa ka Chhattisgarh naduh ka taïew kaba nyngkong mynta u bnai. Kane ka kynhun ka la lah ban pynliem ïa ka Bihar da 3-1 kol ha ka Group-A, kumjuh ïa ka Jharkhand da 5-0 kol ha ka 11 tarik, ïa ka Andhra Pradesh da 8-1 kol ha ka 13 tarik bad ïa ka Rajasthan da 3-0 kol ha ka 17 tarik.
