Shillong, Jymmang 25
U Mikel Arteta u la ñiad ïa ki ummat jong ka jingkmen kiba la mih hadien ka jingïohpdiang ka Arsenal ïa ka nam lahduh ha ka Premier League bad u la kyntu ïa ki rangïalehkai ba kin pynurlong sa ha ka Champions League.
Kane ka kynhun jong u Arteta ha kaba khatduh ka la ïoh ban pdiang ïa ka trophy nam lahduh ha ka Premier League hadien ba ka la lah ban pynliem noh da 2-1 kol pyrshah ïa ka Crystal Palace ha ka sngi U Blei. Ïa kine la thep da u Gabriel Jesus bad u Noni Madueke ha Selhurst Park na ka bynta ban pynthikna ïa ka jingtam haduh 7 poiñ ïa ka Manchester City kaba la wan ha ka kyrdan ba-ar. Ka Arsenal ka la dep ban pynthikna ban rah ïa katei ka nam hadien 22 snem, hadien ba ka City ka la ïakhaid bad ka Bourne-mouth myn ha ka sngi Ba-ar jong ka taïew ba la lah.
Hynrei ka jingïohpdiang ïa ka trophy ka la long ka jingkmen kaba khraw ïa u Arteta lem bad ki rangïa-lehkai jong u namar ka long ka jingjop kaba khraw ha ka thaiñ shatei lam mihngi jong ka London.
U Arteta u la pynpaw ha ki lad pathai khubor, “Ngam don kyntien ban pynpaw ha kum kane ka por. Ka dap da ka mynsiem ka jingkmen bad ka jingsngewsarong halor kane ka jingjop.”
