Shillong, Jymmang 25
Ka Nongkseh SSCC bad ka Shillong Lajong FC ki la ïoh ban bat ïa ka kyrdan kaba nyngkong bad ba-ar na ka Group-A ha ka quarterfinal league jong ka 5th Meghalaya State League, hadien ba kine ki kynhun ki la lah ban khur jingjop ha ka lah sngi U Blei ha SSA Stadium, Polo.
Kumba ka long kine ki ar kynhun ki la don lypa kham shakhmat ha kane ka Group, bad kaba sah hi ka long mano napdeng jong ki ki ban bat ïa ka kyrdan ba nyngkong bad ba-ar.
Na ka liang ka Nongkseh ka la lah ba kan pynliem da 2-1 kol ïa ka Mawlai, katba ka Shillong Lajong ka la jop da 2-0 kol ïa ka Rangdajied United ha ka jingïalehkai ba khatduh jong kane ka group.
Ïa ki ar kol na ka Nongkseh la thep da u Chesterpaul Lyngdoh (8′) bad Sheen Stevenson Sohktung (14′), katba u Syndongmiki Lyngdoh (46′) u la pynphai kylla shi kol na ka bynta ka Mawlai.
Katba na ka liang ka Rangdajied, ka la hap ban pdiang ïa ka nam rem kaba hynriew sien kynthih, ha kaba kane ka kynhun kaba la rah teng ïa ka nam lahduh ha u snem 2023, ka la shu lah ban ïoh rung da ka said na ka Group-H.
Ïa ki artylli ki kol ka Shillong Lajong la thep da u Fridison Wanñiang (42′, 54′).
Haba phai biang sha ka Nongkseh kaba ïakhun nyngkong eh ha ka MSL, ka la ïai bteng ba kan jam shakhmat bad ki 13 tylli ki nam jop, ha kaba khlem pep kan ai mynsiem ïa ka kynhun ynda haba ka khreh ba kan ïakhun ïa ka semi-final.
Ha ka sngi Ba-ar kan dei artad kaba kut jong ka jingïakhun quarterfinal league jong ka Group-B, ha kaba ka Maram FC kan ïakhun pyrshah ïa ka Langsning kaba bat ïa ka kyrdan ba hakhlieh, ha ka por 2 baje nohphai sngi bad ha ka por 6 baje janmiet, ka Rymbai Shkenshynriah SC pyrshah ia ka Nangkiew Irat FC.
Kumban shu pynpaw hangne ka Langsning FC ka la buh jaka lypa ïalade sha ka semi-final bad kaba sah hi pat kan long ka jingïaknieh hapdeng ka Shkenshynriah bad ka Nangkiew Irat, namar ha ka kylla ïakhun ba nyngkong, ka Shkenshynriah ka la lah ban pynliem da 2-1 kol ïa ka Nangkiew Irat, ha kaba ka jingïakhaid kan long kaba biang pura ïa kane ka kynhun ba kan jam sha ka semi final, katba ka Nangkiew ka donkam ban khur ïa ka jingjop khnang ba kan ïoh rung sha ka semi final.
