Kyiv, Jymmang:
Ka Ukraine ka la sakhi ïa ki jingjia kiba shyrkhei ha ka shi-miet ha kaba kawei na ki jingshah thombor kaba jur bha jong ka Russia ha kine ki taiew ba la dep ka la ktah ïa katei ka nongbah. Ka Kyiv ka la shah bom jur hadien ba u Vladimir Putin u la byrngem ban siew kylliang na ka bynta ki jinghiar thma ha ki bynta ba shatei jong ka Ukraine ba la bat da ka Russia.
Ka video kaba la saphriang online ka pyni ïa u namding ba la bthei ha pdeng jong ka nongbah Kyiv. Ha ka dur, lah ban iohi ïa ka jingbthei kaba jur ha ka por ba utei u ‘namding ka Russia u leit hap bad bthei ha katei ka jaka.
Ki heh sorkar ka Ukraine, ki la iathuh ba kumba 600 tylli ki drone bad 90 tylli ki ‘namding la siat ha katei ka jinghiar thma. Ki tiar iada suiñ ki la lah ban tehlakam noh ïa kiba bun na ki, hynrei ym baroh.
Kawei ka jaka khaii bad kawei ka iew kaba don marjan bad ka Lukianivska metro station, ki la shah pynjot lut ha katei ka jingiakhih, ong ka Euromaidan Press. Napdeng ki jaka ba la shah pynjulor ka don kawei ka café kaba rit kaba la dep shna biang bad plie biang hynriew sien hadien ki jingshah thombor jong ka Russia kham mynshwa.
Ha katei ka jingshah thombor, saw ngut ki briew, ki la iap, bad da ki phew ngut, ki la mynsaw. Ki iing ki sem, ki skul, ki iew ki hat bad ki jaka treikam ki la shah pynjulor ha kylleng ka nongbah bad kiwei kiwei ki thain. La iohsngew ïa ki jingbthei baroh shi miet ha Kyiv. Ki nongshong shnong ki la mareh sha ki jaka ieng metro bad ki jaka rieh tngen hapoh khyndew na ka bynta ka jingshngain namar ba ki missile bad ki drone ki la bthei ha ka nongbah.
U Andrii Sybiha u la ther tyngeh ïa ka Russia hapoh ka rynsan ‘X’, ha kaba u la ong ba katei ka jinghiar thma kam long pyrshah ïa ki shipai hynrei ka dei ka jingthombor dusmon ban pyn mynsaw ïa ki riew paidbah. U la thoh ba ka Russia ka la pynlong ïa kawei na ki jinghiar thma kaba heh tam ha ka shi-miet ïa ka nongbah Kyiv jong ka Ukraine bad katto- katne kiwei pat ki thain jong ka Ukraine, kynthup ïa ka Cherkasy, Kharkiv, Kropyvnytskyi, Odesa, Poltava, Sumy bad Zhytomyr.
