Shillong, Jymmang 26
Ka Zee Entertainment Enterprises ka la ong ba ka dangïakren bad ka FIFA ban pyni paidbah ïa ki jingïalehkai jong ka FIFA World Cup 2026 ha India bad kane ka lah ban pynkut noh ïa ki jingsngew artatien ki paidbah ieit phutbol jong ka ri ban sakhi ïa kane ka lympung ïalehkai kaba heh ha ka pyrthei.
Kane ka la wan hadien ba ki nongpynïaid ïew ïa ki jingïalehkai ha India ki la don hapdeng ki kynrum kynram jong ka jingbym lah ban shimti ban pyni ïa kane ka lympung ïalehkai kaba heh ha ka pyrthei.
Kane ka jingpynbna ka la wan hadien katto katne bnai jong ka jingbym don ki ban pynthikna ha ka ban pynïaid ïew na India watla kane ka lympung ka dangsah sa tang shi bnai. Ïa kane ka lympung ïalehkai World Cup 2026 yn pynlong lang da ka United States, Canada bad ka Mexico ka ban sdang naduh 11 tarik u Jylliew haduh 19 tarik u Naitung.
Kane ka jingbym thikna ban pynïaid ïew ka la poi shaduh ka jingtuklar da ka ïingbishar dangshen mynta u bnai, haba ka Delhi High Court ka la pynmih ïa ki jingpynbna sha ka Sorkar Pdeng bad ka Prasar Bharati ba kan pyni ïa kane ka lympung na ka bynta ka jingbit jingbiang jong ki paidbah riew ieit photbol ha India ban kin ïoh ban sakhi ïa ki jingïalehkai lyngba ka jingpyni paidbah kum ka Doordarshan bad ka DD Sports.
Ka jingkyrpad ka kyntu ba ïa ka FIFA World Cup la dep ban pynbna kum ka jingïalehkai kaba donkam ïa ka ri katkum ka Sports Broadcasting Signals (Mandatory Sharing with Prasar Bharati) Act, 2007.
Kane ka lympung ïalehkai mynta u snem kan dei ka sien kaba nyngkong eh ban don haduh 48 tylli ki kynhun bad 104 tylli ki jingïalehkai. Ha ka lympung ïalehkai kaba la long ha Qatar ha u snem 2022, la jop da ka Argen-tina ïa kaba la lamkhmat da u Lionel Messi, la pyni ïa ki jingïalehkai ha India lyngba ka JioCinema bad ka Sports18.
Ka kompeni ka la pynpaw ïa kane ka jingïakren haba pynbna ïa ka jingpynmih ïa ka ‘Unite8 Sports’, ka kynhun thymmai jong ki lad pathai ïa ki jingïalehkai. Kum shi bynta jong ka jingpynkhih, ka Zee kan pynmih saw tylli ki channel – Unite8 Sports 1 bad Unite8 Sports 1 HD ha ka ktien Hindi, ha ryngkat ka Unite8 Sports 2 bad Unite8 Sports 2 HD ha ka ktien Phareng – ka ban pyni ïa ka jingïalehkai phutbol, kabaddi, kriket, badminton, wrestling, boxing bad kiwei kiwei ki jingïalehkai combat nalor kiwei pat.
“Da ka jingthmu ban kyntiew ïa ki jingïalehkai, ka kompani ka dangïakren ruh bad ka Fédération Internationale de Football Association (FIFA) ban pyni ïa ki jingïalehkai jong ka FIFA World Cup 2026 ha India,” la ong kat kum ka kyrwoh jong katei ka kompani.
